काठमाडौं । भारतको रक्षा मन्त्रालयले पाकिस्तानको लाहोरमा एक वायु रक्षा प्रणाली ध्वस्त पारिएको छ दाबी गरेको छ । साथै, भारतीय रक्षा मन्त्रालयले पाकिस्तानले ड्रोन र मिसाइल प्रयोग गरेर भारतका धेरै सैन्य अड्डाहरूलाई लक्षित गर्ने प्रयास गरेको बताएको छ ।
अर्कोतर्फ, पाकिस्तानले पनि भारतमाथि यस्तै आरोप लगाउँदै २५ वटा भारतीय ड्रोन खसालेको दाबी गरेको छ । तर, बीबीसीले दुवै देशले गरेको कुनै पनि दाबीको स्वतन्त्र रूपमा पुष्टि गरेको छैन ।
भारतको रक्षा मन्त्रालयले एक विज्ञप्तिमा भनेको छ कि पाकिस्तानले ड्रोन प्रयोग गरेर अवन्तीपुरा, श्रीनगर, जम्मू, पठानकोट, अमृतसर, कपुरथला, जालन्धर, लुधियाना, आदमपुर, बठिंडा, चण्डीगढ, नाल, फलोदी, उत्तरलाई र भुज लगायत उत्तरी र पश्चिमी भारतका धेरै सैन्य प्रतिष्ठानहरूमा आक्रमण गर्ने प्रयास गरेको छ ।
भारतीय रक्षा मन्त्रालयले के भन्यो ?
भारतको रक्षा मन्त्रालयले पाकिस्तानको ड्रोन आक्रमणलाई एकीकृत काउन्टर युएएस ग्रिड र वायु रक्षा प्रणालीद्वारा निष्क्रिय पारिएको बताएको छ । भारतको रक्षा मन्त्रालयको विज्ञप्तिमा भनिएको छ कि पाकिस्तानी ड्रोनका भग्नावशेषहरू अब धेरै स्थानहरूबाट बरामद भइरहेका छन् जसले आक्रमण पाकिस्तानले गरेको प्रमाणित गर्दछ ।
रक्षा मन्त्रालयले भारतले पनि पाकिस्तानलाई उस्तै तीव्रताका साथ जवाफ दिएको दाबी गरेको छ । भारतले आफ्नो विज्ञप्तिमा भनेको छ कि उसको सशस्त्र सेनाले बिहीबार बिहान पाकिस्तानका धेरै स्थानहरूमा रहेको वायु रक्षा राडार र प्रणालीहरूलाई लक्षित गरेको थियो । यद्यपि, मे ७ मा ‘अपरेशन सिन्दूर’ बारे एक प्रेस ब्रिफिङको क्रममा भारतले पाकिस्तानी सैन्य प्रतिष्ठानहरूलाई लक्षित नगरिएको बताएको थियो ।
भारतीय सैन्य प्रतिष्ठानहरूमा हुने कुनै पनि आक्रमणको उचित जवाफ दिइने कुरा पनि दोहोर्याइयो । भारतको रक्षा मन्त्रालयले भनेको छ कि पाकिस्तानले जम्मू कश्मीरको कुपवाडा, बारामुल्ला, उरी, पुन्छ, मेन्धर र राजौरी सेक्टरहरूमा नियन्त्रण रेखामा मोर्टार र भारी तोपखाना प्रयोग गरेर बिना उक्साहट गोलीबारी गरेको छ । मन्त्रालयले पाकिस्तानी गोलाबारीमा तीन महिला र पाँच बालबालिकासहित १६ निर्दोष व्यक्तिको ज्यान गएको बताएको छ।
यस्तो छ पाकिस्तानको दाबी
अर्कोतर्फ, पाकिस्तानले २५ वटा भारतीय ड्रोन खसालेको दाबी गरेको छ । पाकिस्तानले भनेको छ कि यी ड्रोनहरू पाकिस्तानका विभिन्न शहरहरूमा खसालिएको छ ।
पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले बिहीबार एक पत्रकार सम्मेलनमा भने कि भारतले मे ७ को रातदेखि ूड्रोनको सहयोगमा घुसपैठ गर्ने प्रयास गरिरहेको छ । जनरल चौधरीले सेनाको कारबाही जारी रहेको बताए ।
उनले लाहोर, गुजरनवाला, चकवाल, अटक, रावलपिन्डी, मियाँवाली र कराँचीमा ड्रोन ध्वस्त पारिएको बताए । पाकिस्तानी प्रवक्ताको भनाइप्रति भारतले कुनै प्रतिक्रिया जनाएको छैन र बीबीसीले पाकिस्तानले गरेको दाबी स्वतन्त्र रूपमा पुष्टि गर्न सकेन ।
अहिलेसम्म के भएको छ ?
भारतले बुधबार बिहानै पाकिस्तान र पाकिस्तान प्रशासित कश्मीरमा हवाई आक्रमण गरेको छ । भारतले पाकिस्तानमा रहेका आतंकवादी लुक्ने ठाउँहरूलाई लक्षित गरेको बताएको छ ।
यसैबीच, पाकिस्तानले आफ्नो भूमिमा आतंकवादी शिविर रहेको भारतको दाबीलाई अस्वीकार गरेको छ । भारतले बुधबार पाकिस्तान र पाकिस्तान प्रशासित कश्मीरमा हवाई आक्रमणको घोषणा गरेको छ । भारतले यस कारबाहीलाई ुअपरेशन सिन्दूरु नाम दियो ।
भारतीय विदेश सचिव विक्रम मिश्रीले भने, ‘पहलगाम आक्रमणको अनुसन्धानले आतंककारीहरूको पाकिस्तानसँगको सम्बन्ध उजागर गरेको छ ।’ उनले भने कि पाकिस्तानस्थित आतंकवादी मोड्युलहरूमाथि भारतको गुप्तचर निगरानीले भारतविरुद्ध थप आक्रमणको सम्भावनालाई संकेत गरेको थियो, त्यसैले यसलाई सम्बोधन गर्न आवश्यक मानिएको थियो ।
भारतले पाकिस्तान र पाकिस्तान प्रशासित कश्मीरका ९ स्थानहरूलाई निशाना बनाएको बताएको छ । जबकी पाकिस्तानले पछि भन्यो कि आक्रमणहरू ६ स्थानमा भएका थिए ।
पाकिस्तानले पाँच भारतीय जेट र एक ड्रोन खसालेको दाबी गरेको छ, जसको भारतले पुष्टि गरेको छैन । बुधबार राष्ट्रलाई सम्बोधन गर्दै पाकिस्तानका प्रधानमन्त्री शाहबाज शरीफले पाकिस्तानले आफ्नो प्रतिक्रिया दिएको बताए ।
पाकिस्तानले भारतको कारबाहीमा ३१ जनाको मृत्यु भएको र ५७ जना घाइते भएको बताएको छ । विश्वभरका नेताहरूले भारत र पाकिस्तानलाई शान्ति कायम राख्न अपील गरेका छन् । अमेरिकी राष्ट्रपति डोनाल्ड ट्रम्पले यदि कुनै पनि तरिकाले सहयोग गर्न सक्छन् भने त्यो गर्ने बताएका छन् ।
प्रतिक्रिया