पाकिस्तानमाथि भारतीय हवाई आक्रमणमा अजहरको परिवारका १० सदस्यसहित १४ जनाको मृत्यु

काठमाडौं । भारतले पाकिस्तानमाथि गरेको हवाई आक्रमणमा अतिवादी संगठनका प्रमुख जैश–ए–मोहम्मद मसूद अजहरको परिवारका १० सदस्यसहित १४ जनाको मृत्यु भएको बताइएको छ । अतिवादी संगठन जैश–ए–मोहम्मदले अजहरको परिवारका १० सदस्य र चार नजिकका सहयोगी मारिएको बताएको छ । यस सम्बन्धमा, जैश–ए–मोहम्मद (जेईएम) ले बुधबार एक विज्ञप्ति जारी गरेको छ ।

विज्ञप्तिमा भनिएको छ, ‘मृत्यु हुनेहरूमा मसूद अजहरकी दिदी र भिनाजु, भतिजा, भतिजाकी श्रीमती, भतिजी र परिवारका पाँच छोराछोरी रहेका छन् । जैश–ए–मोहम्मदले यो पनि भन्यो कि मसूद अजहरका तीन नजिकका सहयोगीहरू र ती सहयोगीहरूमध्ये एककी आमा आक्रमणमा मारिएका थिए ।

विज्ञप्ति अनुसार, पाकिस्तानको बहावलपुरमा रहेको सुभान अल्लाह मस्जिदमा भएको आक्रमणमा मसूद अजहरका आफन्तहरूको मृत्यु भएको छ । फेब्रुअरी २०१९ मा, जैश–ए–मोहम्मदले जम्मू–कश्मीरमा आत्मघाती बम विस्फोट गराएको थियो, जसमा ४० सैनिक मारिएका थिए ।

बुधबार बिहान भारतीय सेनाकी कर्णेल सोफिया कुरेशीले पत्रकार सम्मेलनमा भारतीय सशस्त्र बलले ६–७ मे २०२५ को राति १ः५ देखि १ः३० बजेको बीचमा ‘अपरेशन सिन्दूर’ सुरु गरेको बताइन् ।

उनले भनिन्, ‘यो अपरेशन अप्रिल २२ मा पहलगाममा भएको भयानक आतंकवादी हमलाको शिकार भएका निर्दोष नागरिकहरू र उनीहरूका परिवारहरूलाई न्याय प्रदान गर्न सुरु गरिएको थियो, यस अपरेशनमा नौ आतंकवादी शिविरहरूलाई लक्षित गरी पूर्ण रूपमा ध्वस्त पारिएको थियो ।’

पाकिस्तानले भारतीय हवाई आक्रमणमा २६ जना सर्वसाधारण मारिएको र ४६ जना घाइते भएको बताएको छ भने भारतले नियन्त्रण रेखामा सीमापार गोलाबारी हुँदा १० जना भारतीय सर्वसाधारण मारिएको र ३२ जना घाइते भएको बताएको छ ।

सीमापार गोलीबारीमा मृत्यु हुनेको संख्या १० पुग्यो : भारतीय सैन्य अधिकारी

एक शीर्ष भारतीय सैन्य अधिकारीले सीमापार गोलाबारीबाट मारिएका सर्वसाधारणको संख्या १० पुगेको पुष्टि गरेका छन् । यसबाहेक ३२ जना घाइते भएका छन् ।

यी सबै मृत्युहरू भारत र पाकिस्तान बीचको पुंछ जिल्लामा नियन्त्रण रेखा नजिकै भएका हुन् । यसैबीच, पाकिस्तानले भारतीय हवाई आक्रमणमा २६ जना सर्वसाधारणको मृत्यु भएको र ४६ जना घाइते भएको जनाएको छ ।

पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले नियन्त्रण रेखामा भारतीय हवाई आक्रमण र गोलीबारीमा २६ जनाको मृत्यु भएको बताएका छन् ।

यद्यपि, भारतले मिडियालाई भनेको छ कि पाकिस्तान र पाकिस्तान प्रशासित कश्मीरमा गरिएको हवाई हमला मापन गरिएको र गैरउत्तेजक थियो । भारतले यो पनि दाबी गरेको छ कि उसले कुनै पनि सैन्य प्रतिष्ठानलाई निशाना बनाएको छैन ।– बीबीसी हिन्दी