काठमाडौँ । प्रमोद लामिछानेद्वारा निर्मित वृत्तचित्र ‘द अनसाइलेन्स्ड’को नेपालमा प्रिमियर हुने भएको छ । आगामी ६ अक्टोबरमा काठमाडौँको सिटिसी मलस्थित सिडिसी सिनेमाजमा प्रदर्शनी हुने भएको हो । वेन फिल्म्स प्रालिको विशेष प्रस्तुति रहेको यो डकुमेन्ट्री नेपालमा पहिलोपटक प्रदर्शन हुन लागेको हो । तोसित घटानेद्वारा निर्देशित यस डकुमेन्ट्रीमा ४ नेपाली महिलाहरूको संघर्षको कथा समेटिएको छ । उनीहरूको सामाजिक मान्यताहरूसँगको चुनौतीपूर्ण यात्रा र जीवनको पुनर्निर्माणका अनुभवलाई चित्रण गरिएको छ ।
१ घण्टा ९ मिनेट लामो डकुमेन्ट्री वास्तविक कथाहरूबाट प्रेरित छ । जसमा राधा, माया, सुन्दरी, र सुकुनको जीवनका अद्भुत यात्रालाई प्रस्तुत गरिएको छ । डकुमेन्ट्री हेर्न दर्शकले ७५० रुपैयाँको टिकट काट्नुपर्नेछ ।
बालविवाहपछि घरेलु दासत्वमा बाध्य भएकी राधाले बाँच्नका लागि आफ्नो अभिनेत्री बन्ने सपना त्याग्छिन्। त्यस्तै, मायाले कुवेतमा मानव बेचबिखनको भयावहताबाट उम्किएर नेपाल फर्कन्छिन् । यहाँ एक उद्यमीका रूपमा नयाँ जीवनको सुरुआत गर्छिन् । शारीरिक रूपमा होचो भएकी सुन्दरीले समाजका मान्यताहरूलाई चुनौती दिँदै पुरुष प्रधान भूमिकामा पुजारी बन्छिन् । र, पितृसत्तात्मक भेदभावलाई दृढताका साथ जित्छिन् ।
सुकुन जसले आफ्नो तल्लो जातको कारण सामाजिक अवरोधहरूलाई सहेर नेपालको सुन्दर हिमालहरूको बीचमा हस्तकलाका उत्पादनहरू बनाएर आफ्नो परिवारलाई सहयोग गर्छिन् ।
डकुमेन्ट्री यी ४ महिला पात्रको वरिपरि घुमेको छ । नेपालपछि यो डकुमेन्ट्रीको अन्तर्राष्ट्रिय प्रिमियर सिड्नी अस्ट्रेलियाको प्यालेस सेन्ट्रल सिनेमाजमा अक्टोबर ३१ तारिखमा हुनेछ । त्यसैगरी, क्यालिफोर्निया, संयुक्त राज्य अमेरिकाको लाएमल्ले थिएटर्समा १० जनवरीमा प्रदर्शनी हुनेछ ।
यस डकुमेन्ट्रीले यसअघि थुप्रै अन्तर्राष्ट्रिय महोत्सवमा सहभागीसहित अवार्डहरू जितिसकेको छ । यो डकुमेन्ट्री इन्टरनेसनल इन्डिपेन्डेन्ट फिल्म अवार्ड्समा गोल्ड विजेता, इटालीको रियाले फिल्म फेस्टिबलमा अवार्डको विजेता हो ।
त्यसैगरी, लिभरपुल बेलायतको इन्डी अवार्ड्समा फाइनलिस्ट, बार्सिलोना स्पेनको इन्डी अवार्ड्समा फाइनलिस्ट भएको यो डकुमेन्ट्री डेनमार्कको इन्टरनेसनल विमेन्स फिल्म फेस्टिबल, बेलायतको लिफ्ट अफ फिल्ममेकर सेसस, रोमानियाको सिनेमेटिक युरोपियन फिल्म फेस्टिबल, टोकियो जापानको लिफ्ट अफ फिल्म फेस्टिबल र न्युयोर्क फिल्म एन्ड सिनेमाटोग्राफी अवार्ड्समा अफिसियल छनोट भएको थियो । वेन फिल्म्सले अहिले नेपाल, लिथुआनिया, संयुक्त राज्य अमेरिका र बेलायतमा आफ्नो कार्यालयहरूसहित विश्वव्यापी रूपमा सञ्चालन गरिरहेको छ ।
प्रतिक्रिया