न्युयोर्कमा गोली प्रहारबाट १० को मृत्यु

न्युयोर्क । अमेरिकाको न्युयोर्क राज्यको बफेलोमा भएको गोली काण्डमा परेर कम्तीमा पनि १० जनाको ज्यान गएको छ । प्राप्त समाचारमा सुपरमार्केटमा शनिबार अपराह्न गोली चलेको हो । गोली लागेर अरु केही घाइते पनि भएका छन् ।

अमेरिकी समाचार समिति एसोसिएटेड प्रेस (एपी)का अनुसार शनिबार अपराह्नमा एकजना व्यक्ति सरासर सो सुपरमार्केटमा प्रवेश गरेर गोली चलाएको थियो । सैनिकको पोशाकमा आएको एक युवकले गोली हानेको बताइएको छ । ती व्यक्तिले सो सुपरमार्केटमा रहेका कर्मचारीमाथि अन्धाधुन्ध गोली चलाएको थियो ।

बफेलोका प्रहरी विभागका प्रमुखले गोली चलाउने व्यक्तिलाई नियन्त्रणमा लिइएको जनाएका छन् । उनले गोली प्रहार गरी हत्या गर्ने ती व्यक्तिलाई नियन्त्रणमा लिइएको ट्वीटरमार्फत् जानकारी दिएका हुन् । अमेरिकी राष्ट्रपति जो बाइडेनले सो हत्याकाण्डको बारेमा जानकारी लिएको ह्वाइट हाउसले जनाएको छ । राष्ट्रपति बाइडेनले गोलीकाण्डमा मारिएका व्यक्तिका परिवारप्रति समवेदना व्यक्त गर्दै ‘घरेलु आतंकवाद अन्त्य गर्न सबै प्रयास गर्नुपर्ने आह्वान पनि गरेका छन् ।

ह्वाइट हाउसद्वारा जारी विज्ञप्तिमा बाइडेनले भनेका छन्, ‘हामी दश व्यक्तिको परिवारका लागि शोकाकुल छौँ । जसको जीवन मूर्खतापूर्णरूपमा लिइयो र सबैजना जसले शारीरिक र भावनात्मक पीडा भोगिरहेका छन् । हामी कानून प्रवर्तनका सदस्य र अन्य पहिलो प्रतिक्रियाकर्ताको बहादुरीका लागि कृतज्ञ छौँ जसले जीवन बचाउन तुरुन्तै कदम चालेका छन् । प्रथम महिला र म पीडित र तिनीका परिवारका लागि प्रार्थना गरिरहेका छौँ । यस देशका सबै हृदय बफेलोका जनतासँग छन् ।’

‘घरेलु आतङ्कवादको कुनै पनि कार्य, घृणित सङ्कुचित राष्ट्रवादी विचारधाराको नाममा गरिएको कार्यसहित हामी त्यस्ता कुराको विरोधी हौँ । घृणाको कुनै सुरक्षित बन्दरगाह हुनु हुँदैन । हामीले घृणाले उत्तेजित घरेलु आतङ्कवादको अन्त्य गर्न आफ्नो शक्तिमा सबै गर्नुपर्दछ,’ उनले भनेका छन् । सामूहिक गोलीबारी संयुक्त राज्य अमेरिकामा एक बढ्दो चिन्ताजनक समस्या हो ।

सैन्य गियर लगाएको र हेलमेट क्यामेराको साथ लाइभ स्ट्रिमिङ गर्ने एक १८ वर्षीय किशोरले बफेलोको एक सुपरमार्केटमा राइफलद्वारा शनिबार गोली चलाउँदा १० जनाको मृत्यु भएको र अन्य तीन जना घाइते भएका थिए ।