बढ्यो चुनावी सरगर्मी : विगतका आश्वासन सोध्दै मतदाता

सुदूरपश्चिम । आसन्न स्थानीय तह निर्वाचनका लागि मत माग्न घरदैलो पुगिरहेका उम्मेदवारसँग मतदाताले विगतका चुनावका बेला दिइएको अश्वासन किन पूरा नगरेको भनी तिखो प्रश्न गर्न थालेका छन् । शनिबार धनगढी उपमहानगरपालिका–१३ मा पुगेका उम्मेदवारसँग स्थानीय मतादाताले चुनावका बेला ठूलाठूला अश्वासन दिने, तर चुनाव जितेर गएपछि नफर्किने भन्दै गुनासो पोखेका थिए । उम्मेदवारले मत माग्दै गर्दा स्थानीयवासी डबल सिंहले असन्तुष्टि पोख्दै भने, ‘तपाईहरूलाई किन र केका लागि भोट दिने, के काम गर्नुभएको छ र ?’ उनको प्रश्नपछि पार्टीका कार्यकर्ता अलमलिएका थिए । सोही वडाका देवराज पाण्डेयले आफूहरूको बसोबास रहेको हिमाली टोलको सडकको स्तरोन्नति गरिदिन बारम्बार अनुरोध गरिए पनि कसैबाट सुनुवाइ नभएको गुनासो गरे ।


उनले भने, ‘टोलको सडकको स्तरोन्नति कहिले एडिबीको कार्यक्रममार्फत् गरिँदै छ भनिन्छ, कहिले प्रदेश सरकारले विनियोजन गरेको बजेटबाट गरिँदै छ भन्ने अश्वासन दिइन्छ, तर अहिलेसम्म सडकको स्तरोन्नति हुन नसक्दा जनताको नेताप्रतिको विश्वास टुट्न लागेको छ ।’ उक्त बस्तीमा उचित सडक, ढल निकास, टेलिफोन, खानेपानीलगायत विकासका पूर्वाधारको सुविधा अझैँसम्म पुग्न नसक्दा उपमहानगरपालिका भएर पनि बत्तीमुनिको अँध्यारोको नियति भोग्न आफूहरू बाध्य भएको स्थानीयवासीको गुनासो छ । उक्त वडामा शनिबार (नेकपा एमाले), नेपाली कांग्रेससहितको गठबन्धन र राष्ट्रिय जनमोर्चाले चुनाव लक्षित कार्यक्रम गरेका थिए ।


धनगढी उपमहानगरपालिका क्षेत्रमा खासगरी वर्षायाममा डुबानको ठूलो समस्या छ । सडक स्तरोन्नति हुन नसक्दा बन्ने खाल्डाखुल्डी सडकमा नगरवासी हिँड्न बाध्य छन् । फोहोर व्यवस्थापनको समस्या समाधान हुन सकिरहेको छैन । सबै वडामा समानुपातिक विकास गर्ने भनिए पनि त्यसो हुन सकिरहेको छैन । विकासका योजना नेता कार्यकर्ताको पहुँच र प्रभावका आधारमा छनोट भएर कार्यान्वयन गर्ने गरिएकाले अधिकांश ग्रामीण वडामा विकासका आधारभूत पूर्वाधार पुग्न नसकिरहेको जनगुनासो छ ।


मुख्य बजार क्षेत्रका बिग्रे भत्किएका सडक मर्मत निर्माणमा ध्यान दिइएको छैन भने बजार क्षेत्रमा सार्वजनिक शौचालयको ठूलो समस्या छ । रोजगारी र स्वारोजगारीको अवसर र सम्भावना वर्सेनि न्यून हुँदै गएका छन् । टोल बस्तीका घरदैलोमा पुगेर मतदातालाई उम्मेदवारले रिझाउन थालेपछि चुनावी सरगर्मी चार दिनयता ह्वात्तै बढेको छ । प्रत्यासीले निरन्तर गर्ने गरेका भेला र बैठकमा आफू विजयी हुने रणनीति बुनिरहँदा बाटो, सार्वजनिकस्थल, चिया पसलमा जमघट हुने सर्वसाधारण पनि आपसमा चुनावमा को विजयी हुनसक्छ भनेर जोड घटाउको चर्चा गरिरहेका भेटिन्छन् ।


निर्वाचनको माहौल तातेसँगै तालमेल गरेर साझा उम्मेदवारी दिएका र तालमेलबिना नै एकल रूपमा उम्मेदवारी दिएकाबीचको प्रतिस्पर्धा यस अघिका निर्वाचनको तुलनामा रोचक र भिन्न देखिने विश्लेषण मतदाताको छ । स्थानीय तहको निर्वाचनमा कैलालीका १३ वटै पालिकामा सत्ता साझेदार दलका साझा प्रत्यासी र गठबन्धन बाहिर रहेका नेकपा (एमाले) लगायतका दलका प्रत्यासीबीच मुख्य प्रतिस्पर्धा हुन लागेको मतदाताको आँकलन छ ।


जिल्लाका पालिका तहको प्रमुख र उपप्रमुखमा सत्ता गठबन्धनले तालमेल गरेर साझा उम्मेदवारी दर्ता गराए पनि वडा तहमा तालमेल भएको छैन । विगतको स्थानीय तहको निर्वाचनमा हाल सत्ता गठबन्धनमा रहेका दलहरूले पाएको मतभारको आधारमा आसन्न चुनावमा सबै पालिकामा गठबन्धन दलका प्रत्यासीले बाजी मार्ने ती दलका कार्यकर्ताको दाबी छ ।
नेपाली कांग्रेसका वडाध्यक्षका प्रत्यासी धर्मराज ओझाले भने, ‘उम्मेदवारी मनोनयन गर्ने दिनसम्म देखिएको असमझदारी विस्तारै अन्त्य हुँदै गएकाले आफूहरू विजय हुनेमा दुई मत छैन ।’ तर विगतको स्थानीय तहमा पाएको मतलाई मुख्य आधार मानी चुनावी जोड घटाउ गरेर विजयी हुने आँकलन गर्नु गलत हुने अर्को थरिका मतादाताको तर्क छ । निर्वाचनको विजय वा पराजयमा यो अवधिमा बढेका नयाँ मतदाताको पनि भूमिका रहने विश्लेषण गरिएको छ ।


गठबन्धन गर्दा देखिएको अन्योल र टिकट वितरणमा देखिएको पार्टीको आन्तरिक किचलो लगायतका कारण गठबन्धन पक्षका प्रत्यासीमा सबै मत जान नसक्ने एकल उम्मेदवारी दिएकाहरूको तर्क छ । गठबन्धनमा देखिएको असन्तुष्टिको फाइदा उठाउने दाउमा विपक्षी उम्मेदवार छन् । पाँच वर्ष अघिको स्थानीय तह निर्वाचनमा जिल्लाका सात पालिकामा एमाले, तीनमा कांग्रेस, दुईमा माओवादी केन्द्र र एकमा तत्कालीन मधेशी जनअधिकार फोरम लोकतान्त्रिकका उम्मेदवार प्रमुखमा विजयी भएका थिए । त्यसैगरी सुदूरपश्चिम प्रदेशको एकमात्र उपमहानगरपालिका धनगढीको प्रमुखमा तीन जना प्रत्यासीबीच कडा प्रतिस्पर्धा हुन लागेको आँकलन मतदाताको छ । सत्ता साझेदार दलका तर्फबाट प्रमुखका प्रत्यासी नेपाली कांग्रेसका नृपबहादुर ओड, नेकपा एमालेका रणबहादुर चन्द र स्वतन्त्र उम्मेदवार गोपाल हमालबीच कडा टक्कर हुन लागेको मतदाताको भनाइ छ ।

प्रतिक्रिया