शीतलहरबाट जनजीवन प्रभावित

कलैया । केही दिनदेखि चलिरहेको शीतलहरले गर्दा अत्यधिक जाडो बढ्न थालेपछि यहाँका जनजीवन प्रभावित बनेको छ । गत १८ पुसदेखि एक्कासि शीतलहर चल्न थालेपछि जाडो बढ्न गई बालबालिका, वृद्धवृद्धा असहाय, गरिब विपन्न र श्रमिकलाई जीवनयापन गर्न निकै कठिनाइ भइरहेको छ ।

ज्यालादारी, मजदुरी गर्ने बाहेकका मान्छे जाडोका कारण अति आवश्यक कामबाहेक घरबाट बाहिर ननिस्कँदा हाटबजार, सरकारी कार्यालय, यतायात समेतमा चलहपहल कम देखिएको छ । यही १५ माघसम्म विद्यालय कोभिडका कारण बन्द हुने जनाइएको छ ।

त्यसैगरी मधेस प्रदेशको नामकरण भएको खुसीयालीमा प्रदेश सरकारले दुई दिन बिदा दिएको हँुदा पनि कर्मचारी जाडोबाट केही राहत महसुस गरेका छन् । अत्यधिक जाडो बढेपछि सर्वसाधारणले ठाउँठाउँमा आगो बालेर जाडो छल्ने गरेका छन् भने जिल्लाको १६ स्थानीय तहमा रहेको विपद् व्यवस्थापन समितिले न्यानो कपडा कम्बल वितरण गर्दै ठाउँठाउँमा आगो ताप्ने प्रबन्धसमेत मिलाएको सिम्रौनगढ नगरपालिकाका प्रमुख विजयशंकर यादवले जानकारी दिए ।
अहिलेसम्म जाडोका कारण जिल्लामा मानवीय क्षति नभएको प्रहरी प्रवक्ता राजेश थापाले जानकारी दिए ।