रंग‍-विविध

डा लम्साल पुरस्कृत

सौर्य अनलाइन २०७७ फागुन २४ गते ७:१७ मा प्रकाशित

हेटौँडा । नेपाली साहित्यमा योगदान दिँदै आएका साहित्यकार तथा सञ्चारकर्मी डा. नवराज लम्साल पुरस्कृत हुने भएका छन् । उनलाई यस वर्षको ‘महालक्ष्मी साहित्य पुरस्कार–२०७७’ बाट पुरस्कृत गरिने भएको हो । महालक्ष्मी विकास बैंक लिमिटेड र मातृभूमि साहित्य समाज मकवानपुरले संयुक्तरुपमा प्रदान गर्दै आएको यो पुरस्कार यस वर्ष लम्साललाई प्रदान गर्न लागिएको हो । ५१ हजार नगद राशिसहित सम्मानपत्र रहेको छ । गतवर्षसम्म २१ हजार एकको रहेको महालक्ष्मी साहित्य पुरस्कारको राशि यस वर्षबाट वृद्धि गरी ५१ हजार बनाइएको बैंकका शाखा प्रबन्धक शम्भुप्रसाद पराजुलीले बताए । सामाजिक उत्तरदायित्व निभाउँदै बैंकले साहित्य क्षेत्रमा योगदान पु¥याउने व्यक्तित्वलाई सम्मान तथा पुरस्कृत गर्दै आइरहेको पराजुलीले जानकारी दिए ।

यही २९ फागुनमा एक कार्यक्रमको आयोजना गरी महालक्ष्मी साहित्य पुरस्कारबाट डा लम्साल, मातृभूमि राष्ट्रिय सम्मान २०७७ बाट कवि देवराज खरेल र मातृभूमि मकवानपुरश्री सम्मान २०७७ बाट इतिहास लेखक केदारप्रसाद न्यौपानेलाई सम्मान गरिने छ । सोही दिन कवि दिनेश शर्मा न्यौापानेको कविता संग्रह विमोचन गरिनेछ । यसैबीच मातृभूमि साहित्य समाज मकवानपुरले आगामी २८ फागुनमा एक कार्यक्रम आयोजना गरी विभिन्न विधिमा १५ साहित्य सम्मान प्रदान तथा पुरस्कार प्रदान गर्ने भएको छ ।

कोरोनाका कारणसहित विभिन्न समस्याले प्रदान गर्न बाँकी रहेका गत वर्षका सम्मान र पुरस्कार यसै वर्ष प्रदान गरिने गरी कार्यक्रमको आयोजना गर्न लागिएको संस्थाका अध्यक्ष माधव पोख्रेलले जानकारी दिए । अन्य पुरस्कार मातृभूमि राष्ट्रिय पुरस्कार, २०७७ बाट संयुक्तरुपमा नाट्यकर्मी सुनिल पोखरेल र निशा शर्मा पोखरेललाई, ईश्वरी स्मृति–मातृभूमि पुरस्कार,२०७५ बाट गजलकार पुष्प अधिकारी, ईश्वरी स्मृति–मातृभूमि पुरस्कार,२०७६ बाट मिथिला नाट्यकला परिषद्, नित्य गोविन्द स्मृति–मातृभूमि संगीत पुरस्कार २०७६ बाट बाबु क्षेत्रीलाई प्रदान गरिने छ । यसैगरी श्याम श्रेष्ठ स्मृति–मातृभूमि पुरस्कार २०७६ बाट समाजसेवी राजकुमार सिंधी, होमनाथ बलदेवी–मातृभूमि छन्द साहित्य सम्मान २०७७ बाट साहित्यकार केशवराज आमोदी, मायादेवी–मातृभूमि पुरस्कार २०७७ बाट कवि अनुराधा शर्मा प्रदान गरिने भएको हो ।

त्यस्तै, शेखर शर्मा रिजाल–मातृभूमि शैक्षिक पुरस्कार २०७६ बाट प्राडा नारायणप्रसाद खनाल र २०७७ बाट सुवर्णबहादुर थापा, हातेमालो–मातृभूमि युवा सिर्जनशील साहित्य सम्मान २०७७ बाट सुवास खनाल, क्षेत्रबहादुर स्मृति–मातृभूमि सम्मान २०७७ बाट कवि डा गणेशकुमार पौडेललाई प्रदान गरिने छ । यसैगरी राजकुमार स्मृति–मातृभूमि सम्मान २०७७ बाट आसाम निवासी कृष्णविक्रम राणा, केशवलाल स्मृति मातृभूमि पत्रकारिता पुरस्कार २०७७ बाट सुवर्णलाल श्रेष्ठ, झलकबहादुर बानियाँ स्मृति जीवन संघर्ष मातृभूमि सम्मान २०७७ बाट विसु लामा र मंगलादेवी श्रेष्ठ मातृभूमि बाल सम्मान २०७७ बाट दिव्या चौलागाईलाई प्रदान गरिने भएको हो ।

प्रतिक्रिया

पछिल्ला अपडेट्स

लोकप्रिय