खोजखबर

हुम्लामा पुनः टेलिफोन सेवा अवरुद्ध

सौर्य अनलाइन २०७७ मंसिर ८ गते १९:४३ मा प्रकाशित

सिमकोट । हुम्लाको तल्लो क्षेत्रमा रहेका चार वटा गाउँपालिकामा पुनः सञ्चार विच्छेद भएको छ । नमस्ते टेलिफोनले काम नगर्दा यहाँका नागरिकले पटकपटक सास्ती खेप्दै आउनुपरेको छ । जिल्लाका सर्केगाड, अदानचुली, खार्पुनाथ, ताजाकोट, चंखेली, नाम्खा र सिमकोट गाउँपालिकाभित्र नौ वटा नमस्ते टेलिफोनका टावर निर्माण गरिएको भए पनि सन्तोषजनक काम नगरेको यहाँका स्थानीयले गुनासो गरेका छन् ।

जिल्लाको तल्लो क्षेत्रमा रहेको कालिकाको नमस्ते टेलिफोन सेवाले करिब एक महिना बढीदेखि काम गर्न छोडेको छ । यस्तै सर्केगाड गाउँपालिकाको भदालीमा रहेको नमस्ते टेलिफोन सेवाले महिनौँदेखि काम गर्न छोडेको स्थानीय शुरबहादुर रोकायाले बताए । पटकपटक मर्मतका लागि नेपाल टेलिकममा खबर गर्दा कुनै सुनुवाइ नभएको उनको गुनासो गरेको छ ।

राम्रोसँग मर्मत हुन नसक्दा जिल्लाको तल्लो क्षेत्रमा रहेको ताजाकोट, चंखेली, अदानचुली गाउँपालिकामा केही समय अगाडि मर्मत भएको भनिएको नमस्ते टेलिफोन सेवा फेरि अवरुद्ध भएको छ । विगत लामो समयदेखि हुम्लाको नमस्तेको टावरले काम नगर्दा मोबाइलमा रहेको रुपैयाँ मात्र सकिने तर फोन नहुने समस्या आएको उनले बताए ।

सात वटै गाउँपालिका भित्रका करिब ५० हजारभन्दा बढी नागरिक यो सेवाबाट वञ्चित हुनुपरेको छ । एकअर्कामा फोन गर्दा नसुनिने अवस्था अझैँसम्म पनि नहटेको स्थानीयको गुनासो रहेको छ । जिल्ला बाहिर रहेका आफन्तसँग कुरा गर्न खोज्दा पनि फोन नभएपछि विभिन्न काममा बाधा परेको चंखेली गाउँपालिकाका स्थानीय विष्णुभक्त जैसीले बताए । चंखेली गाउँपालिका मेल्छाममा रहेको नमस्तेको टावरले ९ कात्तिकदेखि काम नगरेपछि सो ठाउँका करिब आठ हजार नागरिक टेलिफोन सेवाबाट वञ्चित हुनुपरेको यहाँका स्थानीयले गुनासो गरेका छन् ।

०००

प्रतिक्रिया

पछिल्ला अपडेट्स

लोकप्रिय