खोजखबर

महाकाली अस्पतालको आइसोलेसन भरिभराउ

सौर्य अनलाइन २०७७ जेठ २२ गते ९:०२ मा प्रकाशित

कञ्चनपुर । जिल्लाको भीमदत्तनगरमा रहेको महाकाली अस्पतालको आइसोलेसनकक्ष कोरोना भाइरसका बिरामीले भरिभराउ भएको छ।

२० जना क्षमताको आइसोलेसनमा १५ कोरोना संक्रमित भर्ना गरिएका छन्। एक जना आरडिटी पोजेटिभलाई आइसोलेसनमा राखिएको छ।

मंगलबारदेखि कोरोना संक्रमितको उपचार सुरु गरिएको अस्पतालमा कैलालीको गौरी गङ्गा नगरपालिकाका सात जनालाई बुधबार मात्रै उपचारका लागि भर्ना गरिएको छ। आठ जना कोरोना संक्रमित कञ्चनपुरका रहेका छन्। कारोना संक्रमित सबै जना भारतबाट फर्केका व्यक्ति हुन्।

कैलालीको सेती प्रादेशिक अस्पतालमा आइसोलेसनमा राख्नका लागि ठाउँ अभाव भएपछि उनीहरुलाई महाकाली अस्पतालमा भर्ना गरिएको अस्पतालका डा. सरोज आर्चायले बताए।

उनका अनुसार अस्पतालमा कोरोना शंकास्पद १६ बिरामीलाई समेत राखिएको छ। कोरोनाका बिरामीलाई उपचारका लागि सेफर अस्पतालमा राख्ने तयारी भइरहेको छ। ‘पिसीआर परीक्षणको नतिजा आउन ढिलाइ हुँदा बिरामीलाई राख्न समस्या भएको छ,’ डा. आचार्यले भने।

सुदूरपश्चिम प्रदेश सामाजिक विकास मन्त्रालयको लगानीमा निर्माण गरिएको ५० शैयाको अस्पताल सञ्चालनमा आउन ढिलाइ हुँदा समस्या भएको छ। महाकाली अस्पतालको सघन उपचारकक्षसमेत भेन्टिलेटरको अभावमा सञ्चालनमा छैन।

भेन्टिलेटरका लागि तीन फार्मले बोलपत्र हालेकामा कसैको पनि स्वीकृत भएको छैन। सुदूरपश्चिम प्रदेशमा १४ आइसीयू वार्डमा आठ मात्रै भेन्टिलेटर छन्।

प्रतिक्रिया