बोक्सीको आरोप लगाउने दुई महिला पक्राउ

स्याङ्जा । जिल्लाको चापाकोटमा बोक्सीको आरोप लगाई गालीगलौज गर्ने दुई महिलालाई प्रहरीले पक्राउ गरेको छ । ३८ वर्षीया महिलालाई बोक्सीको आरोप लगाई अपमान गर्ने र पीडा दिएको जाहेरी वडा प्रहरी कार्यालयमा पीडित पक्षले दिएका थिए ।

सोही जाहेरीको आधारमा स्याङ्जाको चापाकोट नगरपालिका–२ बस्ने २५ वर्षीया चन्द्रकला थापा र तनहुँको बन्दीपुर नगरपालिका–६ घर भई हाल पोखरा महानगरपालिका–१६ वस्ने ३३ वर्षीया सोममाया गुरुङलाई प्रहरीले बुधबार पक्राउ गरेको हो ।

पक्राउ परेका दुबै महिलालाई भेदभाव तथा अन्य अपमानजन्य व्यवहारसम्बन्धी कसुरमा मुद्दा दायर गरिएको र अनुसन्धान प्रक्रिया अगाडि बढाएको जिल्ला प्रहरी कार्यालय स्याङ्जाका प्रहरी नायब उपरीक्षक नवीनकृष्ण भण्डारीले बताए । ‘मंगलबार बोक्सी आरोप लगाउनुका साथै गालीगलौज गरेको भन्दै पीडित महिलाको जाहेरी आएको थियो, जाहेरीको आधारमा आरोपित महिलालाई पक्राउ गरेका छौँ । अनुसन्धान भइरहेको छ’, भण्डारीले बताए ।