पत्रकारले हस्ताक्षर बुझायो

भक्तपुर । नेपाल पत्रकार महासंघ जिल्ला शाखा भक्तपुरले प्रेस स्वतन्त्रताको पक्षमा गरिएको हस्ताक्षर जिल्ला प्रशासन कार्यालय भक्तपुरमार्फत सरकारलाई बुझाएको छ ।

महासंघले सङ्कलित पत्रकारहरुको हस्ताक्षर आज नेपाल पत्रकार महासंघ जिल्ला शाखा भक्तपुरका अध्यक्ष पुष्करराज बुढाथोकीको नेतृत्वमा गएको पत्रकारहरुको टोलीले भक्तपुरका सहायक प्रजिअ दिलीपकुमार लामिछानेमार्फत सरकारलाई बुझाएको हो ।

सरकारले संसद्मा दर्ता गराएको मिडिया काउन्सिल विधेयक फिर्ता लिन माग राख्दै नेपाल पत्रकार महासंघले घोषणा गरेको तेस्रो चरणको आन्दोलनको कार्यक्रमअन्तर्गत हस्ताक्षर बुझाएको अध्यक्ष बुढाथोकीले बताए । सहायक प्रजिअ लामिछानेले गृहमन्त्रालयमार्फत प्रधानमन्त्री कार्यालयमा उक्त हस्ताक्षर बुझाइने जानकारी दिए ।