अनुमतिविनै चलेका विद्यालयलाई कारबाही गरिने

धनुषा २९ वैशाख । धनुषामा अनुमतिविना अवैध रूपमा सञ्चालनमा रहेका बोर्डिङ स्कुललाई कारबाही गर्ने तयारी गरिएको छ । जिल्ला शिक्षा कार्यालय धनुषा, प्याब्सन, एनप्याब्सन, अभिभावक, पुस्तक व्यवसायी सम्मिलित बैठकमा जिल्लामा सञ्चालित अनुमतिविना अवैधरूपमा सञ्चालित बोर्डिङ स्कुललाई शुद्धीकरण गर्ने प्रक्रिया अघि बढाइएको धनुषाका जिल्ला शिक्षा अधिकारी महेन्द्र महतोले बताए ।  जिशिअ महतोले सात दिनभित्र जिल्लामा सञ्चालित निजी विद्यालयमा अनुमति प्राप्त विद्यालयको खोजीकार्य तीव्र बनाउने निर्णय गरिएको बताउँदै जिल्लामा कतिको निजी विद्यालय अनुमति प्राप्त छन्, हामी त्यसको खोजी गरेर कति कक्षासम्म अनुमति प्राप्त गरेको र कति कक्षासम्म सञ्चालन गरेको बारेमा समेत खोजबिन गर्ने निर्णय गरिएको बताए ।
बैठकबाट जिल्ला शिक्षा कार्यालय धनुषाबाट अनुमति प्राप्त विद्यालयको अन्तिम नामावली पेस गर्दैै कुनै विद्यालयले प्रमाण जुटाउन तत्कालै नसकेको खण्डमा प्रमाण पेस गर्न समयसीमा दिने निर्णय गरिएको समेत जिशिअ महतोले बताए । उनले कुनै विद्यालयको प्रमाण छुटेमा वा सरोकारवालाले गरेको अनुगमनमा कुनै त्रुटि भएको खण्डमा सच्याउने अवधि दिइने बताए ।  यसका साथै अधिकारी महतोले पाठ्यपुस्तकको नाममा पाठ्यपुस्तक बिक्रेता, विद्यालयले कमिसनको खेलमा लागेर अभिभावकहरूबाट चर्को शुल्क असुल्ने गरेको जनगुनासो बढेको भन्दै चर्को शुल्क लिने त्यस्तो विद्यालयलाई समेत कारवाहीको दायरामा ल्याउने जानकारी दिए ।
प्याब्सनका अध्यक्ष विश्वलाल सिंहले यो साता जिल्ला विद्यालयहरू अनुगमन गरिने र सरकारको शैक्षिक प्रावधान अनुसार शैक्षिक गुठीमा दर्ता भएपछि मात्र विद्यालय सञ्चालन गर्नुपर्ने रहेको छ, र सो नभएमा विद्यालय अवैध मानिनेछ । प्याब्सन अध्यक्ष सिंहको अनुसार जिल्लाभरिमा सय बढी विद्यालयहरू अवैध हुन सक्छ, जनकपुर उपमहानगरपालिका भित्रै मात्र ३० बढी निजी विद्यालयहरू विनाअनुमति सञ्चालनमा रहेको छ । उनले भने, ‘त्यस मध्ये १० वटा त यस्तो छ कि एक कक्षासम्मको पनि अनुमति पाएको छैन, तर विद्यालय सञ्चालन गरिरहेका छन् ।’