छात्रामाथि गिद्धे दृष्टि लगाएको आरोपमा शिक्षक निलम्बन

सौर्य समाचार
झापा, २५ वैशाख । छात्रामाथि अनैतिक व्यवहार गरेको भन्दै कनकाई नगरपालिकाको एउटा विद्यालयका शिक्षकलाई विद्यालय व्यवस्थापन समितिले आइतबार निलम्बनका लागि जिल्ला शिक्षा कार्यालयलाई सिफारिस गरेको छ ।

कनकाई नगरपालिका–९ घैलाडुब्बास्थित आदर्श विद्या मन्दिर उच्चमाध्यमिक विद्यालयमा कार्यरत शिक्षक भोला ढुंगेलले कक्षा ६ मा अध्ययनरत छात्रामाथि अनैतिक व्यवहार गरेको भन्दै अभिभावकले उजुरी गरेपछि विद्यालय व्यवस्थापन समितिले उनलाई निलम्बनको सिफारिस गरेको हो ।

शिक्षक ढुंगेलले अनैतिक व्यवहार गरेको भन्दै छात्राले शिक्षिकालाई बताएपछि सो घटना सार्वजनिक भएको थियो । घटना सार्वजनिक भएपछि आइतबारदेखि विद्यालय दुई दिनका लागि बन्द गर्ने निर्णय गरेको प्रधानाध्यापक योनदेन सुनुवारले बताए ।

छात्रामाथि अनैतिक व्यवहार गर्ने शिक्षक ढुंगेल फरार रहेका छन् । उनलाई विद्यालयमा झिकाएर कारबाहीको माग गर्दै अभिभावकले आइतबार विद्यालयमा तालाबन्दी समेत गरेका छन् । अभिभावकले शिक्षक ढुंगेलमाथि कानुनी कारबाहीको माग गर्दै इलाका प्रहरी कार्यालय घैलाडुब्बामा उजुरी दिएका प्रहरी नायब उपरीक्षक केशवकुमार थेवेले जानकारी दिए ।