खोजखबर

भ्रमण सफल : प्रम

सौर्य अनलाइन २०७२ फागुन १० गते १३:५५ मा प्रकाशित

KP_oli copyकाठमाडौं, ९ फागुन । भारत भ्रमणमा रहेका प्रधानमन्त्री केपी शर्मा ओलीले आफ्नो भारत भ्रमण सफल भएको बताएका छन् । उनले आफ्नो पहिलो विदेश भ्रमण दुई देशको सम्बन्ध विस्तारमा उल्लेखनीय उपलब्धि भएको बताए ।

नयाँदिल्लीस्थित नेपाली दूतावासमा आइतबार आयोजित पत्रकार सम्मेलनमा प्रधानमन्त्री ओलीले भारत सरकार, दल, नेता, बुद्धिजीवी, जनता र सञ्चारमाध्यमले देखाएको स्वागत, आतिथ्यता र सौहार्दपूर्ण व्यवहारको प्रशंसा गर्दै अब दुई देशका बीचमा सबै प्रकारका असमझदारी हटेकाले आफ्नो भ्रमण सफल र परिणाममुखी भएको बताए ।

उनले भने, ‘मेरो भ्रमणको उद्देश्य पूर्णतः सफल भएको छ । म यहाँ कुनै ‘सपिङ लिस्ट’ लिएर आएको थिइनँ । केवल मित्रता व्यक्त गर्न र लिन आएको हुँ । त्यो प्राप्त भएको छ । उनले भूकम्पपछिको अवस्थामा भारतले गरेको सहयोगप्रति धन्यवाद पनि दिए ।

प्रधानमन्त्री ओलीले नेपालको संविधानमाथिका असन्तुष्टिका नाममा भारतीय सीमामा अर्काे नाकाबन्दी गर्नुपर्ने कुनै आवश्यकता नभएको बताए । संविधानमा कुनै ठाउँमा विभेद र असमानता नरहेको र जनताले देखाएका कुनै विषय भएमा संवादका आधारमा संशोधन गर्न सरकार लचिलो भएकाले अर्काे चरणको आन्दोलनमा जानुपर्ने आवश्यकता नरहेको स्पष्ट गरे ।

संयुक्त लोकतान्त्रिक मधेसी मोर्चाले पुनः नाकाबन्दीको कार्यक्रम ल्याउने चेतावनी दिएको भन्ने भारतीय पत्रकारको प्रश्नमा प्रधानमन्त्री ओलीले एक हिन्दी गीतको बोल ‘कोही तो बतादो हमे…’ स्मरण गर्दै भने, ‘संविधानमा कतै विभेद छ र पुनः नाकाबन्दी गर्छु भनेर कसैले भन्छ भने म स्वदेश फर्केर सोध्नेछु कि संविधानमा कहाँ छ विभेद ? किन असन्तुष्ट ? आउनुस् खुला दिमागले छलफलमा बसौँ ।’ उनले नेपालमा ८ वर्ष लामो प्रजातान्त्रिक प्रक्रियाबाट समावेशी लोकतान्त्रिक चरित्रको संविधान बनेको जनाउँदै भने, ‘यो रातारात वा एकाएक बनेको संविधान होइन । प्रक्रिया र सामग्री दुवै दृष्टिले लोकतान्त्रिक छ ।’

संविधान जारीपछि तराई–मधेसका दलले गरेको आन्दोलन र भारतको अघोषित नाकाबन्दीका कारण नेपालमा पेट्रोलियम पदार्थको आपूर्तिमा समस्या उत्पन्न भएको थियो ।

पछिल्ला दिनमा भारत–चीनसँग थप नाका खोल्ने र सहयोग लिने तयारीबारे सोधिएको प्रश्नमा प्रधानमन्त्री ओलीले नेपाल कुनै मुलुकविरुद्ध कुनै मुलुकलाई प्रयोग गर्ने (कार्ड खेल्ने) पक्षमा नरहेको र संविधानपछिको नेपाललाई आर्थिक समृद्धिको बाटोमा डो¥याउन अग्रसर रहेको स्पष्ट गरे ।

पत्रकार सम्मेलनमा उपप्रधानमन्त्री तथा परराष्ट्रमन्त्री कमल थापाले प्रधानमन्त्री ओलीको भ्रमणले दुई देशको सम्बन्ध पूर्ववत् (सामान्य) अवस्थामा फर्काउन भूमिका निर्वाह गरेको बताए ।

प्रतिक्रिया

पछिल्ला अपडेट्स

लोकप्रिय