सागका लागि तेक्वान्दोको छनोट पूरा

काठमाडौं, २१ पुस । दोस्रो तथा अन्तिम दिन मंगलबार १० खेलाडी छनोट गर्दै भारतमा माघ–फागुनमा हुने १२औँ दक्षिण एसियाली खेलकुद (साग) का लागि तेक्वान्दो छनोट प्रतियोगिता सम्पन्न भएको छ । दोस्रो दिन आआफ्नो तौलसमूहमा पहिलो भएका ८ पुरुष र २ महिला खेलाडी छनोट भए ।

सागमा तेक्वान्दोबाट ८ पुरुष र ५ महिला गरी १३ खेलाडी सहभागी हुनेछन् । पहिलो दिन सोमबार ३ महिला खेलाडी छनोट भएका थिए । ६२ केजीमुनि राष्ट्रिय टिमकी आयशा शाक्या, ४९ केजीमुनि नेपाली सेनाकी यानकुमारी चौलागाईं र ४६ केजीमुनि नेपाल प्रहरी क्लबकी रेजिना कार्की छनोट भइसकेका छन् ।

सातदोबाटोस्थित अन्तर्राष्ट्रिय खेलकुद परिसर हातामा रहेको लुम्बिनी हलमा भएको छनोट प्रतियोगिताको पुरुष ८७ केजीमाथि सेनाका प्रेमबहादुर बुढाथोकी पहिलो भए । उनले फाइनलमा सेनामा आबद्ध राष्ट्रिय टिमका पूर्णसिंह गुरुङलाई ६–१ ले पराजित गरे । ६८ केजीमुनि मध्यमाञ्चलका मोहम्मद वेसले बाजी मारे । उनले फाइनलमा प्रहरीका जेम्स प्रधानलाई १८–९ ले हराए । ६३ केजीमुनि प्रहरीका वीरबहादुर महराले फाइनलमा मध्यमाञ्चलका अजय गुरुङको चुनौती समाप्त पार्दै शीर्ष स्थान हात पारे ।

पुरुषकै ५८ केजीमुनि पश्चिमाञ्चलका सुनिल पौडेल, ५४ केजीमुनि एपिएफका चन्द्रबहादुर राना मगर, ७४ केजीमुनि प्रहरीका निश्चलमान श्रेष्ठ, ८० केजीमुनि सेनामा आबद्ध राष्ट्रिय टिमका सक्षम कार्की तथा ८७ केजीमुनि सेनामा आबद्ध राष्ट्रिय टिमका रामहरि महतले सागमा स्थान सुरक्षित गर्न सफल भए ।

निर्णायक भिडन्तमा सुनिलले प्रहरीका रञ्जन श्रेष्ठ, चन्द्रले मध्यमाञ्चलका शेखर उप्रेती, निश्चलले एपिएफका भरत बोहरा, सक्षमले प्रहरीका अनुज पुजारी तथा रामले प्रहरीका दुर्गा थापालाई निराश पारे ।

महिलाको ५७ केजीमुनि सेनामा आबद्ध राष्ट्रिय टिमकी ज्ञानी चुनारा पहिलो भइन् । ज्ञानीले रेणु लामाको यात्रा १५–२ ले पूर्णविराम लगाइन् । ५३ केजीमुनि प्रहरीकी निमा गुरुङले शीर्ष स्थान कब्जा गरिन् । निमाले फाइनलमा सेनाकी नम्रता तुलाधरलाई १९–११ ले पन्छाइन् ।

खेलाडीको बन्द प्रशिक्षण बुधबारदेखि सुरु हुने नेपाल तेक्वान्दो संघका उपाध्यक्ष एवं छनोट समितिका संयोजक टेकराज जोशी (प्रदीप) ले जनाएका छन् । २ दिने छनोटमा ७२ पुरुष र ४५ महिला गरी १ सय १७ खेलाडीले विभिन्न १३ स्पर्धामा प्रतिस्पर्धा गरेका थिए ।