चिसो बढेपछि विद्यार्थी घटे

उदयपुर, १ पुस । एक हप्तायता नेपालको तराई क्षेत्रलगायत उदयपुरको तराई तथा पहाडी क्षेत्रमा समेत व्यापक शीतलहरका साथै चिसो बढ्न थालेपछि यस क्षेत्रका विद्यार्थी विद्यालय नै जान छाडेका छन् । चिसो हुस्सुले रात्रिको समयदेखि बिहानभरि नै प्रभाव पार्न थालेपछि उदयपुरको सुन्दपुर, हँडिया, जोगिदह तथा तपेश्वरी क्षेत्रका तल्ला तहमा अध्ययनरत बालबालिका विद्यालय नै आउन छाडेका हुन् । चिसो र हुस्सु बढ्दै गएपछि प्रायः प्राथमिक तहका साना बालबालिका विद्यालय नै आउन छाडेको जनता उच्चमावि हँडियाका शिक्षक बाबुनारायण चौधरीले बताए ।

व्यापक रूपमा चिसो बढ्दै गएको कारण जिल्लाको पहाडी क्षेत्र रौता, सल्ले, लाफागाउँ इनामे, माझखर्कलगायत निम्नमाध्यमिक तथा प्राथमिक तहका विद्यार्थी पनि विद्यालयमा उपस्थित हुन छाडेको स्थानीय शिक्षकले बताएका छन् । एक हप्तायतादेखि व्यापक हुस्सु र चिसो बढेपछि विद्यालयमा १० प्रतिशत विद्यार्थी पनि उपस्थित हुन छाडेको पञ्चकन्या प्रावि आँपटार बोलुङखा चिसापानीका शिक्षक सिद्धराज काफ्लेले बताए । अहिले व्यापक चिसो बढेपछि माध्यमिक तहका विद्यार्थी पनि कक्षा १० का बाहेक अन्य कक्षाका विद्यार्थी चिसोको कारण उपस्थित हुन छाडेको जाँते उच्चमाविका शिक्षक कुम्भराज राई बताए ।

शिक्षक राईले ‘प्रावि तहमा त विद्यार्थी उपस्थित शून्य नै हुन थाल्यो, मावि तहमा एक हप्तायता आएर विद्यार्थीको उपस्थित सङ्ख्या घट्दै २५ प्रतिशतमा झरेको छ ।’ अचानक व्यापक चिसो र हुुस्सु बढेको कारण पनि आफ्ना बालबालिका चिसोबाट प्रभावित हुने हुनाले अहिले नियमित विद्यालय पठाउन नसकिएको स्वयम् अभिभावक नै बताउन थालेका छन् ।