अर्थबजार

“प्राधिकरणले डलरमा पिपिए गर्नुपर्छ”

सौर्य अनलाइन २०७० वैशाख ३ गते ०:०१ मा प्रकाशित

काठमाडौं, ३ वैशाख । ऊर्जामन्त्री उमाकान्त झाले आवश्यकताको आधारमा नेपाल विद्युत् प्राधिकरणले विद्युत् खरिद सम्झौता (पिपिए) डलरमा समेत गर्न सक्ने बताएका छन् ।

साना तथा मझ्यौला जलविद्युत् आयोजनाहरूलाई स्वदेशी तथा ठूला आयोजनाहरूलाई स्वदेशी र विदेशी दुवै लगानीकर्तालाई आकर्षण गर्नुपर्ने अवस्था रहेको बताउँदै उनले आवश्यकता र त्यसको अध्ययनको आधारमा डलरमा पिपिए गर्नुपर्ने बताए । ‘जलविद्युत्को विकासका लागि स्वदेशी र विदेशी दुवै लगानीकर्ताको खाँचो नेपाललाई छ, आवश्यकता आधारमा पिपिए डलरमा गर्नुपर्छ, गर्नुहुन्न भनेर विदेशी लगानीकर्तालाई भड्काउने काम गर्नुहुन्न ।’ उनले भने ।
मुख्य राजनीति दलका नेताहरूले नेपाल उद्योग वाणिज्य महासंघको कार्यक्रममा जलविद्युत् आयोजनाहरूमा कुनै बन्द, हड्ताल नगर्ने प्रतिवद्धता जनाएको र सरकारले पनि लगानी मैत्री वातावरण बनाइरहेकोले ढुक्क भएर लगानी गर्नका लागि स्वदेशी तथा विदेशी लगानीकर्तालाई आग्रह गरे । ‘स्वदेशी र विदेशी लगानीकर्ताले ढुक्क भएर लगानी गरे हुन्छ, अहिले ऊर्जा क्षेत्रमा लगानीका लागि राम्रो वातावरण बन्दै गएको छ ।’उनले सौर्यसँगको कुराकानीमा भने । पानीमाथिको अनावश्यक राजनीतिको कारणले जलविद्युत् उत्पादन अत्यन्त न्यून भएको बताउँदै पानीमाथिको राजनीति नगर्न पनि उनले सुझाव दिए । अधिकांश निर्माणाधीन आयोजनाहरूलाई समयमै सम्पन्न गर्न तथा नयाँ आयोजनाहरूको निर्माणका लागि द्रुतगतिमा अघि बढाउनका लागि मन्त्रालय लागि परेको बताउँदै उनले भने, ‘लोडसेडिङलाई १० घन्टाभन्दा नबढाउन, ऊर्जा मन्त्रालय, प्राधिकरण र विभागबीच देखिएको असमन्वयको अवस्था अन्त्य गर्न तथा मन्त्रालयमा अड्किएर बसेका फाइलहरू तुरुन्तै निर्णय गर्नका लागि म सक्रिय भएको छु ।’ उनका अनुसार, जलविद्युत् विकासका लागि प्राधिकरण, विभाग र मन्त्रालयको समन्वय अत्यावश्यक भएकोले सबै काम तीन निकायबीचको समन्वय गरी गर्नका लागि उचित वातावरण मिलाइएको छ । उनले सुपर सिक्सलगायतका आयोजनाको रोकिएको प्रक्रिया अघि बढिसकेको जानकारी दिए । ‘म चमत्कार देखाउने मान्छे होइन तर जलविद्युत् विकासका लागि म मन्त्री भइन्जेलसम्म जलविद्युत् विकासका लागि आधारशिला तयार गरेर जान्छु ।’, उनले थपे– ‘सरकारको सचिव भएर धेरै अनुभव लिएको छु, मेरो पुरै शक्ति जलविद्युत्को विकासका लागि सक्रिय हुन्छ ।’
मन्त्री झाले आफू ऊर्जा, विज्ञान तथा प्रविधि र सिंचाईमन्त्री भएको तथा तीन निकायबीचको समन्वयविना ऊर्जा विकास असम्भव भएकोले समन्वय गरेर अघि बढ्ने उनले बताए । ‘ऊर्जा र सिंचाई एउटै भएको भए उत्तम हुन्थ्यो तर अहिले दुवै निकाय तथा वैकल्पिक ऊर्जा प्रवद्र्धन केन्द्रको मन्त्रालय विज्ञान तथा प्रविधि मन्त्रालय पनि मैले सम्हालेको छु, सबैलाई समन्वय गरेर ऊर्जा उत्पादनमा बढी जोड दिन्छु ।’– उनले भने ।

प्रतिक्रिया

पछिल्ला अपडेट्स

लोकप्रिय