खोजखबर

हेलो नेपालका ८७ कर्मचारीलाई

सौर्य अनलाइन २०६९ जेठ ३ गते ४:४३ मा प्रकाशित

काठमाडौं, ३ जेठ । माओवादीनिकट मानिने व्यवसायी अजेयराज सुमार्गीद्वारा सञ्चालित नेपाल स्याटेलाइट टेलिकमले विनासूचना आफ्ना ८७ कर्मचारीलाई जबर्जस्ती अवकाश दिने निर्णय गरेको छ । स्रोतका अनुसार अवकाश दिने निर्णय भएको बैठकमा माओवादी नेता कृष्णबहादुर महरासमेत सहभागी थिए ।
कम्पनीको बोर्ड बैठकले ९२ मध्ये पाँच कर्मचारीलाई राखेर सबैलाई अवकाश दिने कठोर निर्णय लिएको हो । नियुक्तिपत्र र सेवा–सुविधाको माग गरेकाले उनीहरूलाई अवकाश दिइएको स्रोतको दाबी छ । यद्यपि, कम्पनीले यसलाई ‘गोल्डेन ह्यान्डसेक’ बताएको छ ।
साइप्रसस्थित एअरबेल कम्पनीको ५० प्रतिशत लगानी रहेको सो कम्पनीले मध्यपश्चिममा हेलो ब्रान्डको टेलिकम सेवा सञ्चालन गर्दै आएको छ । कम्पनीले प्रशासन तथा मार्केटिङमा कार्यरत कर्मचारीलाई सोमबार नै अवकाश दिएको थियो । बाँकीलाई मंगलबारको बैठकले अवकाश दिने निर्णय गरेको एक कर्मचारीले बताए । सोमबारको बैठकमा माओवादी स्थायी कमिटी सदस्य महरा सहभागी थिए भने मंगलबारको बैठकमा कम्पनीका अध्यक्ष सुमार्गी थिए ।
कम्पनीले इन्जिनियरलाई समेत अवकाश दिने आन्तरिक रूपमा निर्णय गरेपछि मंगलबार वार्ताका लागि पुगेका नेपाल इन्जिनियर्स एसोसिएसनको टोली अपमानित भएर फर्केको छ । एसोसिएसनका पदाधिकारी मंगलबार सञ्चालक समितिका सदस्य तथा निर्देशक राजेश शर्मालाई भेट्न गएका थिए । कम्पनीले पनि टोलीलाई वार्ता गर्न बोलाएको थियो । तर, कार्यालय पुग्दा टोलीलाई भेट्न नदिएको एसोसिएसनका महासचिव अनुराधा शर्माले बताइन् । उनले भनिन्, ‘वार्ता गर्ने भनेर बोलाए तर भित्र पस्न नदिएर फर्काए ।’
पाँच वर्षदेखि कम्पनीमा कार्यरत ४५ इन्जिनियरलाई नियुक्ति पत्रसमेत दिइएको थिएन । ‘तलब नियमित रूपमा खातामा जम्मा हुन्थ्यो । कर काटिन्थ्यो । परिचय पत्र दिइएको थियो । तर, नियुक्तिपत्र दिइएको थिएन,’ शर्माले भनिन् । कम्पनीले नियुक्ति पत्र नदिई कर्मचारीलाई काममा लगाएको र पारिश्रमिकसमेत ज्यादै कम दिएको विषयमा एसोसिएसनले आवाज उठाउँदै आएपछि कम्पनीले सबैलाई अवकाश दिने निर्णय गरेको हो ।
कम्पनी घाटामा गएको भन्दै व्यवस्थापनले कर्मचारीलाई ‘गोल्डेन ह्यान्डसेक’ को अफर गरेको बताएको छ । तर, कर्मचारीले गोल्डेन ह्यान्डसेक नभई जबर्जस्ती अवकाश दिइएको बताएका छन् । ‘गोल्डेन ह्यान्डसेक’ का लागि त समय दिनुपर्‍यो नि †’ एक कर्मचारीले भने ।
कम्पनीले मंगलबारसम्म चार दर्जन कर्मचारीलाई अवकाशपत्र थमाइसकेको छ । कार्यालयमा पालैपालो बोलाएर अवकाश दिइएको पीडित कर्मचारीले बताए । ‘नियुक्तिपत्र माग्ने सबैलाई अवकाश दिइएको छ,’ एक कर्मचारीले भने । कम्पनीमा कार्यरत कर्मचारीले श्रम कार्यालयमा ट्ेरड युनियन पनि दर्ता गर्न खाजेका थिए । व्यवस्थापनले भने आवश्यक सुविधा दिएर कर्मचारी हटाउन सुरु गरिएको दाबी गरेको छ । कति कर्मचारी हटाइएको भन्ने आधिकारिक जानकारी दिएको छैन ।
हालै मात्र मध्यमश्चिमाञ्चल क्षेत्रमा हेलो नेपाल दूरसञ्चार सेवा विस्तार गरेको नेपाल स्याटेलाइट टेलिकम सुरुमा मेरो मोबाइल कम्पनीको सिम बिक्रीका लागि स्थापित आधिकारिक कम्पनी थियो । तत्कालीन समयमा स्पाइस सेल नेपालका प्रबन्ध निर्देशक रहेका अजय सुमार्गीले पत्नी सम्झना अर्याल उर्फ अस्मिता सुमार्गीका नाममा नेपाल स्याटेलाइट टेलिकम स्थापना गरेर देशभर मेरो मोबाइलको सिम वितरणको जिम्मा दिएका थिए । पछि स्पाइससेलबाट अलग भएका सुमार्गीले यही कम्पनीमार्फत पश्चिम नेपालमा हेलो नेपाल ब्रान्डको सेवा सुरु गर्न अनुमति लिएका हुन् ।
त्यतिखेर सञ्चारमन्त्री रहेका कृष्णबहादुर महराले नेपाल स्याटेलाइट टेलिकमलाई मित्रवत् व्यवहार गरेर अनावश्यक सुविधासहित अनुमति दिलाएका थिए ।

प्रतिक्रिया

पछिल्ला अपडेट्स

लोकप्रिय