दबाबबीच बंगलादेश सरकारका प्रमुख युनुसले प्रमुख दलहरुसँग भेटवार्ता गर्दै

ढाका । बंगलादेशका अन्तरिम सरकार प्रमुख तथा नोबेल शान्ति पुरस्कार विजेता मुहम्मद युनुसले शनिबार देशका प्रमुख राजनीतिक दलहरूसँग भेटवार्ता गर्ने तयारी गरेका छन् । यो वार्ता पछिल्लो समय सरकारमाथि बढ्दो राजनीतिक दबाबको कारण महत्वपूर्ण मानिएको छ ।

युनुसले सत्ता समर्थन गर्ने दलहरू मात्र होइन, प्रतिद्वन्द्वी दलहरूसँग पनि सम्वाद गर्ने कार्यक्रम रहेको बताइएको छ । युनुसका प्रेस सचिव शफीकुल आलमका अनुसार उनले डिसेम्बरको अन्त्यमा हुने सम्भावित निर्वाचनको तयारीका विषयमा नेसनलिस्ट पार्टी अफ बंगलादेश (बीएनपी) का नेताहरूसँग छलफल गर्ने छन् ।

साथै, युनुसले मुस्लिम राष्ट्र बंगलादेशको सबैभन्दा ठूलो इस्लामवादी दल इस्लामी पार्टीका नेताहरूसँग पनि वार्ता गर्ने कार्यक्रम रहेको जनाइएको छ ।

देशमा शेख हसिनाको सरकार अपदस्त भएपछि बंगलादेश गम्भीर राजनीतिक संकटमा फसेको छ । पछिल्ला दिनहरूमा ढाकाका सडकमा व्यापक विरोध प्रदर्शन र तनाव देखिएको छ ।

बीएनपीका मिडिया अधिकारी साइरुल कबिर खानका अनुसार, उनीहरूको पार्टीबाट वार्ताका लागि वरिष्ठ नेताहरू सहभागी हुनेछन् । इस्लामी पार्टीका मिडिया प्रवक्ता अताउर रहमानले पनि उनीहरूलाई वार्तामा सहभागी हुन सरकारबाट निमन्त्रणा आएको पुष्टि गरे ।

यसैबीच, बिहीबार एक राजनीतिक सहयोगी र युनुसको कार्यालय स्रोतले बताएका अनुसार, युनुसले यदि प्रमुख दलहरूले आफूलाई समर्थन नगरेमा राजीनामा दिने बताएका छन् ।

बुधबार, बीएनपीका समर्थकहरूले निर्वाचनको मिति तोक्न माग गर्दै पहिलो पटक अन्तरिम सरकारविरुद्ध सडक प्रदर्शन गरेका थिए । प्रदर्शनकारीहरूको दबाबबीच युनुसले निर्वासनबाट फर्किएपछि मुलुकको नेतृत्व सम्हालेको स्मरण गराउँदै चुनावअघि लोकतान्त्रिक सुधारहरू कार्यान्वयन गर्ने आफ्नो जिम्मेवारी रहेको बताए ।