डेनिस मन्त्री लघु जलविद्युत् हेर्न सिधै गाउँमा

कुशेश्वर दुम्जा (सिन्धुली), २३ चैत । डेनमार्कका विकास सहायतामन्त्री क्रिस्चियन फ्रिस ब्याच बिहीबार त्रिभुवन अन्तर्राष्ट्रिय विमानस्थलबाट सिधै सिन्धुलीको कुशेश्वर दुम्जा गाउँ आएका छन् ।

क्रिस्चियन कुशेश्वर दुम्जा–९ मा निर्माण भएको छाँगे खोला लघु जलविद्युत् आयोजनाको प्रभावबारे जानकारी लिन सिधै गाउँ लागेका हुन् । डेनमार्कलगायत मुलुकको आर्थिक तथा वैकल्पिक ऊर्जा प्रवद्र्धन केन्द्र, स्रोत व्यवस्थापन तथा ग्रामीण सशक्तिकरण केन्द्रको प्राविधिक तथा सामाजिक सहयोगमा उक्त आयोजना निर्माण भएको हो । उनले लघु जलविद्युत्बाट स्थानीयबासीले पाएको फाइदाका साथै बायोग्यास, सोलार, सुधारिएको चुल्हो र सुधारिएको घट्टबारे जानकारी लिए । डेनमार्कका राजदूत मोर्गन जेसफर्सनसहित गाउँ आएका उनलाई लघु जलविद्युत उपभोक्ता समितिका अध्यक्ष दवाङसिंह तामाङलगायतले नवीकरणीय ऊर्जाले ल्याएको परिवर्तनबारे जानकारी दिएका थिए ।
क्रिस्चियनले नवीकरणीय ऊर्जाले समुदायमा पुर्‍याएको योगदान र प्रभावबारे जानकारी पाउँदा खुसी लागेको बताए । ‘संसारभर दिगो ऊर्जा विकासका लागि डेनमार्कले सहयोग गरिरहेको छ, गाउँमै आएर हेर्दा यसबाट प्रेरणा मिल्यो, राष्ट्रसंघका महासचिवलाई भेटेर नवीकरणीय ऊर्जाको प्रवद्र्धन गर्न भन्छु,’ उनले भने, ‘जलवायु परिवर्तनले संसारमा असर परिरहेको बेला गाउँमा बनेको आयोजनाले वातावरण संरक्षणमा योगदान दिएको छ ।’