रसियामा जित्यो नेपालको सर्टफिल्म ‘द स्कुल वाल’ ले अवार्ड

काठमाडौँ । नेपालको सर्टफिल्म ‘द स्कुल वाल’ रसियाको चलचित्र महोत्सवको फाइनलमा विजेता बनेको छ । ‘लाइट अफ द वल्र्ड’ नाराका साथ आयोजना गरिएको रसियाको किनो फेस्टिभलमा सहभागी विभिन्न १२१ देशका ३ हजार ४९१ चलचित्रहरूमध्येबाट ‘द स्कुल वाल’ ले पहिलो स्थान हासिल गरेको छ । रसियाको रिबिन्स्क सिटीमा १२ देखि १६ सेप्टेम्बरसम्म सो चलचित्र महोत्सवको आयोजना गरिएको थियो । फाइनल चरणमा अमेरिका, इन्डोनेसिया, भारत, ब्राजिल पनि सहभागी रहेको थियो । नेपालको तर्फबाट ‘द स्कूल वाल’ पहिलो स्थानसँगै भारत दोस्रो र अमेरिकाले तेस्रो स्थान प्राप्त गरेको थियो ।

बालमनोविज्ञानमा आधारित लघुचलचित्र ‘द स्कुल वाल’ यसअघि नाइजेरियाको इडो स्टेट इन्टरनेसनल फिल्म फेस्टिभल, इरानको रोशड इन्टरनेसनल एजुकेसन एन्ड साइन्टिफिक फिल्म फेस्टिभल, जिम्वावेको भर्सिटी फिल्म एक्स्पो र बेलायतको लिफ्ट अफ फिल्ममेकर सेसन्स र फस्ट टाइम फिल्म मेकर सेसन्समा छनोट भएको थियो । ‘द स्कुल वाल’ काठमाडौँ इन्टरनेसनल माउन्टेन फिल्म फेस्टिभलमा छनोट भएर राष्ट्रिय सभा गृहमा प्रदर्शनसमेत भएको थियो ।

लघुचलचित्रमा श्लोक साहले मुख्य भूमिका निर्वाह गरेका छन् । अन्य चर्चित कलाकारहरू सुवास प्रसाद गजुरेल, सरोज लामिछाने, चन्द्रप्रसाद पाण्डे, गीता श्री थापा, आयुषा गौतम, बिदुरप्रसाद सिग्देल, निष्ठा दाहाल, रेहान केसी, खेमराज कोइराला, उद्धव दंगाल लगायतका कलाकारहरूको अभिनय रहेको छ । लघुचलचित्रलाई सुरेन्द्र क्षेत्रीले कास्टिङ डिरेक्सनसँगै निर्माणसमेत गरेका हुन् ।

‘द स्कुल वाल’ मा पर्खालको रूपमा गरिबी, परिस्थिति र जिम्मेवारीलाई प्रस्तुत गरिएको छ । लघुचलचित्रमा विद्यालय नजिकै जुत्ता पालिस गर्ने तराईको एक बालकको संघर्षको कथालाई प्रस्तुत गरिएकोे छ । काठमाडौँमा छायांकन गरिएको लघुचलचित्रको दृश्य नारायण जिसीले खिचेका हुन् । लघुचलचित्रको सम्पादन तथा रंग संयोजन अनिलकुमार महर्जन र सहायक निर्देशन करन साउदको रहेको छ ।

ऐना आट्र्सको प्रस्तुतिमा निर्माण भएको लघुचलचित्र ‘द स्कुल वाल’ को लेखन तथा निर्देशन मोहन अभिलाषीले गरेका हुन् । उनले यसअघि निर्माण गरेका लघु चलचित्र ‘घुर्रा’, ‘भाउ’, ‘पाउलो’ विभिन्न अन्तर्राष्ट्रिय चलचित्र महोत्सवहरूमा छनोट भएर विभिन्न देशहरूमा प्रदर्शनसमेत भइसकेको छ । उनी अहिले नयाँ सर्टफिल्म ‘दृश्य’को तयारी गरिरहेको बताउँछन् । एक सटमा खिचिएको ‘घुर्रा’ले उत्कृष्ट लघुचलचित्रको अवार्डसमेत प्राप्त गरेको थियो ।

रसियाको फेस्टिभल आयोजक टिमबाट कार्यक्रममा सहभागी हुनका लागि निमन्त्रणा आएसँगै रसियन एम्बेसीले भिसा पनि दिएको तर रसिया–युक्रेन युद्धको कारण नेपाल सरकारले नै नेपालीहरूलाई रसिया प्रवेशको लागि रोक लगाएकोले कार्यक्रममा सहभागी हुन नपाएको निर्माता सुरेन्द्र क्षेत्री बताउँछन् । परराष्ट्र मन्त्रालय पनि गएको तर परराष्ट्रले पहिलोपटक रसिया जानेलाई एन ओ सी उपलब्ध नगराउने भन्दै नदिएको उनी बताउँछन् । सरकारले सहयोग नगरे पनि देशको प्रतिनिधित्व गर्न पाएकोमा गर्व लागेको उनी बताउँछन् ।