श्रमदानबाट हेवाखोलामा डाइभर्सन निर्माण हुँदै

पाँचथर । हेवाखोलामा श्रमदानबाट डाइभर्सन बन्दै गरेको छ । जिल्लाको फालेलुङ गाउँपालिकाको घुमाउनेटारस्थित हेवाखोलामा श्रमदानबाट डाइभर्सन निर्माण अघि बढाइएको हो । गत असार २ गते आएको बाढीले पुल भत्काएपछि यातायात बन्द भएको थियो । त्यसपछि बन्द यातायातलाई सुरु गर्न डाइभर्सन निर्माण गरिएको छ ।

केन्द्र र प्रदेश सरकारले पुल बनाउन चासो नदेखाएपछि स्थानीयहरू जुटेर डाइभर्सन निर्माण गरेका हुन् । गाउँपालिकासँग प्रर्याप्त स्रोत नभएपछि पालिकाले श्रमदानका लागि जनतालाई आह्वान गरेको थियो ।

पालिकाको आह्वानपछि सयौँको संख्यामा सर्वसाधारणहरू जुटेर डाइभर्सन निर्माणमा खटेको गाउँपालिकाका उपप्रमुख महेन्द्र जबेगु ‘फुङनिमा’ ले जानकारी दिए ।

श्रमदानका लागि फालेलुङसहित सदरमुकाम फिदिमलगायत क्षेत्रका युवाहरू जुटेका हुन् । डाइभर्सन निर्माणको काम अन्तिम चरणमा पुगेको छ । पालिकाको आह्वानलाई सर्वसाधारणले साथ दिएकाले डाइभर्सन निर्माण गर्न सहज भएको पालिकाका उपाध्यक्ष महेन्द्रहाङ जबेगुले बताए ।

बिकटको बस्तीलाई माथिल्लो सरकारले चासो नदिएपछि आफूहरू श्रमदानमा जुटेको युवाहरूको भनाइ छ । बाढी पहिरोले फालेलुङको जनजीवन अस्तव्यस्त बनेपछि आफूहरू श्रमदानका लागि जुटेको श्रमकर्ता धनुकमार लावतीले बताए ।

बाढी पहिरोले पुल भत्काएपछि फालेलुङ र अन्य स्थानीय तहको सम्पर्क विच्छेद भएको छ । फालेलुङका विद्यार्थीहरू विद्यालय जान सकेका छैनन्। मेमेङ, मच्छेबुङ, सेपी, च्याम्फुवा लगायतका क्षेत्रमा खाद्य संकट सुरु भएको छ । फालेलुङको दर्दनाक अवस्थालाई सहज बनाउन फिदिमदेखि श्रमदान गर्न घुमाउनेटार आएको सुमन लामाले बताए ।

आफ्नो सानो सहयोगमा सर्वसाधारणलाई ठूलो राहत पुग्ने भएपछि साथीहरूसँग श्रमदान गर्न पुगेको फिदिमका युवक सुवास बास्कोटाको भनाइ छ ।

श्रमदानबाटै हेवाखोलामा पाँच वटा ह्युम पाइप राखिएको छ। ह्युम पाइप राखेर ढलान गर्ने काम सकिएकाले अबको तीन दिनभित्रमा यातायात सुचारु गर्न सकिने पालिकाले जनाएको छ। असार २ गतेको बाढीले फालेलुङस्थित हेंवा खोलाका दुई वटा पक्की पुल भत्काएको थियो। जसका कारण यातायात ठप्प बनेको छ।

बाढी पहिरोका कारण पालिकामा २२ करोड बराबरको भौतिक संरचनामा क्षति भएको छ । पालिकाले आर्थिक सहयोग गर्न इच्छुकहरूलाई सहयोगको आह्वान समेत गरेको छ। हालसम्म आठ लाखभन्दा धेरै रकम संकलन भएको छ । डाइभर्सन निर्माण सेटिङ भइसकेर यही असार २९ गते यातायात सञ्चालन हुने प्रेस युनियन केन्द्रीय सदस्य तथा पत्रकार भिमकुमार बास्कोटाले जानकारी दिए ।

(तस्विरहरु भिमकुमार बास्कोटा)