‘सर्वोच्चको आदेश आफ्नो गरिमाभन्दा पृथक’

जनकपुरधाम, ८ असार । एमालेका वरिष्ठ नेता माधवकुमार नेपालले संविधानसभाभन्दा उच्च निकाय अन्य कुनै नभएको बताएका छन् ।

उनले संविधानका बारेमा चार शक्तिद्वारा गरिएको सहमतिका पक्षमा सबैलाई समेट्नु जरुरी रहेको बताए ।

प्रेस चौतारी नेपाल धनुषा शाखाले आज जनकपुरधाममा आयोजना गरेको पत्रकार सम्मेलनमा नेपालले १६ बुँदे सहमतिका सन्दर्भमा अदालतद्वारा गरिएको आदेश संविधानसभाको गरिमा, स्थान र नियमावलीभन्दा पृथक रहेको टिप्पणी गरे ।

‘संविधान निर्माणका लागि भएको नयाँ सहमतिको वातावरणमा एक अर्कालाई दोषारोपण नगरी सबैको बीचमा विश्वास, मन र चित्त बुझाउने प्रयास गर्नुपर्छ’, नेता नेपालले भने ।

‘राष्ट्रिय राजनीति सकारात्मक दिशातर्फ गइरहेकाले अनिश्चितताको भुमरीलाई तोड्दै नयाँ ढङ्गले अगाडि बढ्नु जरुरी छ’, उनले भने, ‘संघीयता ओझेलमा नपरोस् भन्ने कुरालाई गम्भीरतापूर्वक लिई संविधान छिटो जारी गर्नेतर्फ प्रयास हुनुपर्छ ।’