सविनले कुवेती खेलाडीलाई हराए

काठमाडौँ । नेपालका सविनकुमार दियालीले एसियाली क्याडेट तथा जुनियर जुडो च्याम्पियनसिपमा कुवेतका खेलाडीलाई पराजित गरेका छन् । जोर्डनको अम्मानमा भएको प्रतियोगिताको जुनियर पुरुष ६० केजीमुनि सविनले कुवेतका अल्रामजी हसनलाई इप्पोनका आधारमा पराजित गरेको टिम व्यवस्थापक नेपाल जुडो संघका महासचिव नेपाल जुडो संघका महासचिव प्रकाशचन्द्र पाण्डेले जानकारी दिए । जितसँगै सविन प्रिक्वार्टरफाइनलमा प्रवेश गरेका छन् ।

प्रिक्वार्टरफाइनलमा भने सविन विश्व वरीयतामा ४०औँ स्थानका काजाकिस्तानका तुर्सिनाली अलिशेरसँग चुके । सविना बन्दी सहायता नियोग (पाम) का खेलाडी हुन् । पाममा जुडो खेलाडीलाई सूर्यनारायण श्रेष्ठले प्रशिक्षण दिँदै आएका छन् ।

त्यसैगरी जुनियर पुरुष ६६ केजीमुनि पहिलो चरणमा बाइ पाउँदै दोस्रो चरणमा पुगेका विशेष विक विश्व वरीयतामा २४औँ स्थानमा रहेका ताजकिस्तानका खेलाडीसँग खान्सेत्सु वाजामा पराजित भए । प्रशिक्षकमा कविराम घर्ती मगर रहेका छन् । जुडो युनियन अफ एसिया (जेयुए) को आयोजना तथा जोर्डन जुडो महासंघको संयोजनमा भएको प्रतियोगितामा विभिन्न २० राष्ट्रका १७३ खेलाडी सहभागी थिए ।