खेलपछि प्रतिक्रिया दिँदै इंग्ल्यान्डका मुख्य प्रशिक्षक थोमस टुचेलले आफ्ना खेलाडीले यस उपलब्धिप्रति भविष्यमा गर्व गर्न सक्ने बताए । उनले टोलीको लक्ष्य विश्वकप जित्ने भए पनि तेस्रो स्थान पनि सम्मानजनक उपलब्धि भएको उल्लेख गरे
काठमाडौँ । विश्वकपको तेस्रो स्थानका लागि खेलिने प्रतिस्पर्धालाई प्रायः औपचारिक खेलका रूपमा हेरिन्छ । फाइनलमा पुग्न नसकेका २ टोलीबीच हुने भएकाले यसको आकर्षण पनि तुलनात्मक रूपमा कम हुने गरेको छ । तर यसपटक इंग्ल्यान्ड र फ्रान्सबीच भएको तेस्रो स्थानको खेलले त्यो धारणा पूर्ण रूपमा बदलिदियो । दुवै टोलीले आक्रामक खेल प्रस्तुत गर्दा दर्शकले गोलको वर्षा हेर्न पाए । अन्ततः बुकायो साकाको शानदार ह्याट्रिकको मद्दतमा इंग्ल्यान्डले फ्रान्सलाई ६–४ ले पराजित गर्दै प्रतियोगिताको तेस्रो स्थान हासिल गर्यो । विश्वकप फाइनलको एक दिनअघि सम्पन्न यो खेल सुरुदेखि अन्त्यसम्म अत्यन्तै रोमाञ्चक रह्यो । इंग्ल्यान्डले पहिलो हाफमै ४–० को विशाल अग्रता बनाएपछि खेल एकतर्फी हुने अनुमान गरिएको थियो ।
तर दोस्रो हाफमा फ्रान्सले अविश्वसनीय पुनरागमनको प्रयास गर्यो । किलियन एमबाप्पेले २ गोल गर्दै टोलीलाई खेलमा फर्काउने प्रयास गरे भने ब्राड्ली बार्कोला र उस्मान डेम्बेलेले पनि गोल थपे । यद्यपि इंग्ल्यान्डले अन्तिम समयमा थप २ गोल गर्दै जित सुरक्षित गर्यो । खेलको तेस्रो मिनेटमै कार्यवाहक कप्तान डेक्लन राइसले गोल गर्दै इंग्ल्यान्डलाई सुरुआती अग्रता दिलाए । इंग्ल्यान्डका लागि बुकायो साका खेलका सबैभन्दा ठुलो नायक बने । उनले ३७औँ मिनेटमा पहिलो गोल गर्दै टोलीको अग्रता दोब्बर बनाए । त्यसपछि पहिलो हाफको इन्जुरी समयमा दोस्रो गोल थपे । खेलको ८७औँ मिनेटमा पेनाल्टीमार्फत तेस्रो गोल गर्दै उनले आफ्नो दोस्रो अन्तर्राष्ट्रिय ह्याट्रिक पूरा गरे । साकाको उत्कृष्ट प्रदर्शनले इंग्ल्यान्डलाई ऐतिहासिक जित दिलायो ।
साका र राइसबारेक एज्री कोन्साले पनि गोल गर्दै पहिलो हाफमै इंग्ल्यान्डलाई ४–० को बलियो अवस्थामा पु¥याएका थिए । दोस्रो हाफमा फ्रान्सले लगातार दबाब सिर्जना गरे पनि इंग्ल्यान्डले संयम कायम राख्दै खेल आफ्नो पक्षमा राख्न सफल भयो । इन्जुरी समयको आठौँ मिनेटमा जुड बेलिंघमले गोल गर्दै इंग्ल्यान्डको छैटौँ गोल पूरा गरे र टोलीको जित सुनिश्चित बनाए । यो जितसँगै इंग्ल्यान्डले विश्वकप इतिहासमा आफ्नो दोस्रो उत्कृष्ट नतिजा हासिल गरेको छ । इंग्ल्यान्डले सन् १९६६ मा घरेलु भूमिमा विश्वकप जितेको थियो । त्यसयता टोलीले उपाधि जित्न सकेको छैन । यसपटक पनि उपाधिको सपना अधुरै रहे पनि तेस्रो स्थान हासिल गर्नु इंग्लिस टोलीका लागि सकारात्मक उपलब्धि मानिएको छ । खेलपछि प्रतिक्रिया दिँदै इंग्ल्यान्डका मुख्य प्रशिक्षक थोमस टुचेलले आफ्ना खेलाडीले यस उपलब्धिप्रति भविष्यमा गर्व गर्न सक्ने बताए । उनले टोलीको लक्ष्य विश्वकप जित्ने भए पनि तेस्रो स्थान पनि सम्मानजनक उपलब्धि भएको उल्लेख गरे ।
उनले भने, ‘हामी अत्यन्त प्रतिस्पर्धी टोली हौँ । त्यसैले अहिले तेस्रो स्थानमा पूर्ण रूपमा खुसी हुन सकिरहेका छैनौँ । हाम्रो सपना फाइनल पुगेर विश्वकप जित्ने थियो । त्यो पूरा नभएकाले पीडा स्वाभाविक छ । तर समय बित्दै जाँदा खेलाडीहरूले यस उपलब्धिप्रति गर्व गर्नेछन् ।’ टुचेलले सेमिफाइनलमा अर्जेन्टिनासँगको हार अझै पनि दुःखद् रहेको स्वीकार गरे । इंग्ल्यान्डले उक्त खेलमा १–० को अग्रता जोगाउन नसक्दा २–१ ले पराजित भएको थियो । अर्जेन्टिनाका कप्तान लियोनल मेसीले अन्तिम समयमा २ गोलका लागि अवसर सिर्जना गर्दै खेलको परिणाम उल्टाएका थिए । त्यस हारपछि टुचेलको रणनीतिमाथि व्यापक आलोचना भएको थियो । यद्यपि उनले तेस्रो स्थानको जितले टोलीलाई भविष्यमा अझ बलियो बन्न सहयोग गर्ने विश्वास व्यक्त गरे । ‘यो खेलले हामीलाई धेरै कुरा सिकाएको छ । यसले अर्जेन्टिना र फ्रान्सजस्ता शीर्ष टोलीसँगको दुरी कम गर्न मद्दत गर्नेछ । यद्यपि कास्य पदक मनाउन पूर्ण रूपमा सहज महसुस गर्न भने समय लाग्नेछ,’ उनले भने ।
जुड बेलिंघमले खेलको अन्तिम गोल गर्दै यस विश्वकपमा आफ्नो सातौँ गोल पूरा गरे । यो विश्वकपमा कुनै पनि इंग्लिस खेलाडीले गरेको सबैभन्दा धेरै गोल हो । यसअघि कप्तान ह्यारी केनले २०१८ र यस संस्करणमा समान ६–६ गोल गरेका थिए भने ग्यारी लाइनेकरले सन् १९८६ को विश्वकपमा ६ गोल गरेका थिए । फ्रान्सका लागि भने किलियन एमबाप्पे व्यक्तिगत रूपमा चम्किए । उनले दोस्रो हाफमा २ गोल गर्दै आफ्नो विश्वकप करियरको गोल संख्या २२ पुर्याए । यस प्रतियोगितामा मात्रै उनले १० गोल गरिसकेका छन् । यससँगै उनले लियोनेल मेसीको विश्वकप गोलको कीर्तिमान पार गर्दै गोल्डेन बुट दौडमा पनि अग्रता बनाएका छन् । फ्रान्सका लागि यो प्रतियोगिता अपेक्षाअनुसार सफल बन्न सकेन । लगातार तेस्रोपटक विश्वकप फाइनल पुग्ने लक्ष्य बोकेको टोली सेमिफाइनलमा स्पेनसँग पराजित भएको थियो । तेस्रो स्थानको खेलमा पनि पहिलो हाफमा अत्यन्त कमजोर प्रदर्शन गरेपछि टोली दबाबमा परेको थियो । दोस्रो हाफमा फ्रान्सले उत्कृष्ट पुनरागमनको प्रयास गर्यो ।
खेलको ४८औँ मिनेटमा एमबाप्पेले गोल गर्दै अन्तर घटाए । त्यसपछि ६६औँ मिनेटमा उनले अर्को गोल गर्दै स्कोरलाई ४–२ बनाए । त्यसपछि ब्राड्ली बार्कोला र उस्मान डेम्बेलेले पनि गोल गर्दै इंग्ल्यान्डमाथि दबाब बढाए । एक समय स्कोर ४–३ सम्म पुगेपछि खेल निकै रोमाञ्चक बनेको थियो । तर साकाले पेनाल्टीमार्फत ह्याट्रिक पूरा गरेपछि इंग्ल्यान्डले फेरि खेल आफ्नो नियन्त्रणमा ल्यायो । अन्तिम समयमा बेलिंघमले गोल गर्दै फ्रान्सको पुनरागमनको सम्भावना समाप्त गरिदिए । यो खेल विश्वकप इतिहासकै सबैभन्दा धेरै गोल भएको तेस्रो स्थानको खेलका रूपमा पनि दर्ज भएको छ । सन् १९८२ मा हंगेरीले एल साल्भाडोरलाई १०–१ ले हराएयताको यो विश्वकपकै सर्वाधिक गोल भएको खेल हो । कुल १० गोल भएको यो खेलले दर्शकलाई भरपुर मनोरञ्जन दिएको थियो ।
नेपाली समयअनुसार आइतबार बिहान अमेरिकाको मियामीको हार्ड रक स्टेडियममा भएको खेल हेर्न ६४ हजार ४७८ दर्शक उपस्थित भएका थिए । फाइनल नभए पनि रंगशाला भरिभराउ थियो । इंग्ल्यान्ड र फ्रान्स दुवै टोलीका समर्थकसँगै तटस्थ फुटबलप्रेमी पनि ठुलो संख्यामा मैदान पुगेका थिए । मेक्सिको सिटीबाट आएका इंग्ल्यान्ड समर्थक गास्टोन एस्क्विभेलले आफू बाल्यकालदेखि नै प्रिमियर लिग हेर्दै आएको बताए । उनले म्यानचेस्टर युनाइटेडका समर्थक भएकाले इंग्लिस फुटबलप्रति विशेष आकर्षण रहेको बताए । ‘मलाई इंग्लिस फुटबल मनपर्छ । उनीहरूको खेल्ने शैली उत्कृष्ट लाग्छ,’ उनले भने । पेरिसबाट फ्रान्सलाई समर्थन गर्न आएका थोमस भिएल भने एमबाप्पेको ह्याट्रिकको आशामा थिए । एमबाप्पेले २ गोल गरे पनि उनको चाहना पूरा हुन सकेन ।
यो खेल फ्रान्सका मुख्य प्रशिक्षक डिडिएर डेसाम्सका लागि पनि अन्तिम अन्तर्राष्ट्रिय खेल बन्यो । उनले १४ वर्षपछि प्रशिक्षक पदबाट अलग हुने निर्णय गरिसकेका छन् । खेल समाप्त भएपछि उनले आफ्ना खेलाडीलाई अँगालो हाल्दै दर्शकतर्फ हात हल्लाएर बिदाइ गरे । डेसाम्सले पहिलो हाफको प्रदर्शन निकै निराशाजनक रहेको स्वीकार गरे । ‘हामीले यस्तो पहिलो हाफको कल्पना गरेका थिएनौँ । दोस्रो हाफमा भने राम्रो प्रदर्शन ग¥यौँ । सेमिफाइनलको हारपछि हामी मानसिक रूपमा निकै निराश थियौँ । म आफ्नो सम्पूर्ण प्रशिक्षक जीवनलाई केवल यो एक खेलका आधारमा मूल्यांकन गर्न चाहन्न,’ उनले भने । (एजेन्सीको सहयोगमा)
प्रतिक्रिया