इंग्ल्यान्ड र डिआर कंगो आमनेसामने, अन्तिम– १६ मा स्थान सुरक्षित गर्ने थ्री लायन्सको लक्ष्य

काठमाडौँ । फिफा विश्वकप फुटबल २०२६ अन्तर्गत अन्तिम–३२ को बहुप्रतीक्षित खेलमा इंग्ल्यान्डले अफ्रिकी राष्ट्र डिआर कंगोेसँग प्रतिस्पर्धा गर्ने भएको छ । अमेरिकाको मर्सिडिज–बेन्ज स्टेडियममा नेपाली समयअनुसार बुधबार राति ९ः४५ बजे सुरु हुने यो खेलले दुवै टोलीका लागि नयाँ इतिहास लेख्ने अवसर प्रदान गर्नेछ । समूह चरणमा शीर्ष स्थान हासिल गर्दै नकआउट चरणमा पुगेको इंग्ल्यान्ड आफ्नो उपाधि यात्रालाई निरन्तरता दिन चाहन्छ भने उत्कृष्ट तेस्रो स्थान प्राप्त गर्ने टोलीका रूपमा अगाडि बढेको डिआर कंगोे ठुलो उलटफेर गर्ने लक्ष्यका साथ मैदान उत्रनेछ ।

थ्री लायन्सले समूह ‘एल’ मा पहिलो स्थान सुरक्षित गरे पनि टोलीको प्रदर्शनले सबै समर्थक र विश्लेषकलाई पूर्ण रूपमा सन्तुष्ट बनाउन सकेको थिएन । समूह चरणको अन्तिम खेलमा पानामाविरुद्ध मैदान उत्रँदा इंग्ल्यान्डलाई थाहा थियो कि अन्य खेलको नतिजाका कारण हार बेहोरे पनि टोली प्रतियोगिताबाट बाहिरिने अवस्था थिएन । त्यसका बाबजुद समूह विजेता बन्न अन्तिम खेल जित्नु आवश्यक थियो, किनभने क्रोएसिया र घानाले शीर्ष स्थान खोस्ने सम्भावना अझै बाँकी थियो । पानामाविरुद्धको खेलमा इंग्ल्यान्डले पहिलो हाफमा अपेक्षाअनुसार प्रभावशाली प्रदर्शन गर्न सकेन । सन् २०१८ को विश्वकपमा ६–१ ले पराजित गरेको टोलीविरुद्ध पनि पहिलो ४५ मिनेटमा गोलरहित बराबरी कायम रह्यो ।

तर दोस्रो हाफमा कप्तान ह्यारी केन र मिडफिल्डर जुड बेलिंघमले केही मिनेटको अन्तरमै गोल गर्दै टोलीलाई २–० को सहज जित दिलाए । उक्त खेलमा गोल गरेसँगै केन विश्वकप इतिहासमा इंग्ल्यान्डका सर्वाधिक गोल गर्ने खेलाडीसमेत बने । यद्यपि समूह चरणभर इंग्ल्यान्डको प्रदर्शन पूर्ण रूपमा प्रभावशाली भन्न मिल्दैन । तर विश्वकप जित्ने सबै टोलीले समूह चरणमा शतप्रतिशत उत्कृष्ट प्रदर्शन गर्नुपर्छ भन्ने अनिवार्यता पनि छैन । विश्व फुटबलको इतिहासमा उरुग्वे (१९३०), इटाली (१९३८), ब्राजिल (१९७०) र ब्राजिल (२००२) ले मात्र सम्पूर्ण खेल सामान्य वा अतिरिक्त समयमा जित्दै विश्वकप उपाधि जितेका थिए । त्यसैले इंग्ल्यान्डका लागि अहिले सबैभन्दा महत्वपूर्ण कुरा नकआउट चरणमा निरन्तर जित निकाल्नु हो ।

मुख्य प्रशिक्षक थोमस टुचेलको नेतृत्वमा इंग्ल्यान्डले प्रतिस्पर्धात्मक खेलमा अहिलेसम्म हार बेहोरेको छैन । उनले जिम्मेवारी सम्हालेपछि भएका ११ प्रतिस्पर्धात्मक खेलमध्ये १० जित र १ बराबरीको नतिजा निकालेका छन् । यस अवधिमा उनको अपराजित यात्राले टोलीप्रति विश्वास बढाएको छ । इंग्ल्यान्डका पूर्वप्रशिक्षक रोन ग्रिनउडले सन् १९७७ देखि १९८० सम्म १६ खेल तथा रोय होज्सनले २०१२ देखि २०१३ सम्म १४ खेलसम्म अपराजित रहने कीर्तिमान बनाएका थिए । टुचेल त्यो उपलब्धिनजिक पुग्ने प्रयासमा छन् । अर्कोतर्फ डिआर कंगोे यस विश्वकपको सुखद् आश्चर्य मानिएको टोली हो । प्रतियोगिताको सुरुआती खेलमा पोर्चुगलसँग बराबरी खेलेको यस टोलीले कठिन अवस्थाबाट फर्किने क्षमता पनि देखाएको छ ।

उज्बेकिस्तानविरुद्धको निर्णायक खेलमा डिआर कंगोेले खेलको १०औँ मिनेटमै एल्दोर शोमुरोदोभको गोल खाएर पछि परेको थियो । तर दोस्रो हाफमा टोलीले उत्कृष्ट पुनरागमन गर्दै खेल आफ्नो पक्षमा पा¥यो । स्टार फरवार्ड योआने विस्साले २ गोल गरे भने फिस्टोन मायेलेले अर्को गोल थपेपछि डिआर कंगोेले ३–१ को महत्वपूर्ण जित निकाल्दै इतिहास रच्यो । उक्त जितसँगै टोली पहिलोपटक डिआर कंगोेको नामबाट विश्वकपको नकआउट चरणमा प्रवेश गर्न सफल भयो । यसअघि सन् १९७४ मा ‘जाइर’ नामबाट विश्वकप खेलेको टोली समूह चरणबाटै लगातार ३ हारसहित बाहिरिएको थियो ।

मुख्य प्रशिक्षक सेबास्टियन देसाब्रेको नेतृत्वमा डिआर कंगोेले समूह चरणमा ४ अंक जोड्दै सकारात्मक गोल अन्तरका आधारमा उत्कृष्ट तेस्रो स्थान प्राप्त गर्ने टोलीको रूपमा अन्तिम ३२ मा स्थान सुरक्षित गरेको हो । प्रतियोगिता सुरु हुनुअघि धेरैले डिआर कंगोे नकआउट चरणसम्म पुग्ला भन्ने अपेक्षा गरेका थिएनन्, तर टोलीले अनुशासित र संगठित प्रदर्शनमार्फत सबैलाई प्रभावित बनाएको छ । यदि डिआर कंगोेले इंग्ल्यान्ड लाई पराजित गर्न सफल भयो भने अन्तिम–१६ मा मेक्सिको वा इक्वेडरसँग प्रतिस्पर्धा गर्नेछ । त्यसपछि क्वार्टरफाइनलमा ५ पटकको विश्वविजेता ब्राजिलसँग भेट हुने सम्भावना पनि रहेको छ ।

टोली समाचारतर्फ हेर्दा इंग्ल्यान्डको सबैभन्दा ठुलो चिन्ता राइट–ब्याकको स्थान बनेको छ । जारेल क्वान्साह पानामाविरुद्धको खेलमा एंगलमा चोट बोकेपछि मैदान बाहिर छन् । यसअघि नै रिस जेम्स पनि चोटका कारण उपलब्ध छैनन् । प्रशिक्षक टुचेलले क्वान्साह केहीदिनमै फिट हुने आशा व्यक्त गरे पनि यस खेलका लागि उनी उपलब्ध हुने सम्भावना न्यून देखिएको छ । यस अवस्थाले गर्दा डिजेड स्पेन्सले राइट–ब्याकमा सुरुआती रोजाइ पाउने लगभग निश्चित छ । आक्रमणतर्फ बुकायो साका र मार्कस रासफोर्डले पनि विङबाट खेल्ने अपेक्षा गरिएको छ, यदि उनीहरू पूर्णरूपमा फिट रहे भने । कप्तान ह्यारी केन अर्को व्यक्तिगत उपलब्धिको खोजीमा पनि छन् । उनीसँग विश्वकपको नकआउट चरणमा इंग्ल्यान्डका लागि थप गोल गर्दै पूर्व कप्तान ग्यारी लिनेकरको कीर्तिमान नजिक पुग्ने अवसर छ ।

डिआर कंगोेतर्फ भने कुनै नयाँ चोटको समस्या देखिएको छैन । प्रशिक्षक देसाब्रेले उज्बेकिस्तानविरुद्ध प्रयोग गरेको ४–४–२ को सट्टा पुनः ५–३–२ को रणनीति अपनाउन सक्ने अनुमान गरिएको छ । यदि त्यसो भयो भने स्ट्राइकर ब्रायन सिपेङ्गाको स्थानमा डिफेन्डर स्टिभ कपुआडी टोलीमा समावेश हुने सम्भावना छ ।

आक्रमणमा भने फिस्टोन मायेलेले पछिल्लो खेलमा गोल गरेपछि सुरुआती टोलीमा पर्ने दाबेदारी प्रस्तुत गरेका छन् । यद्यपि प्रशिक्षकले अनुभवी ३५ वर्षीय सेड्रिक बाकाम्बुमाथि नै विश्वास गर्ने सम्भावना बढी देखिन्छ । बाकाम्बुसँगै योआने विस्सा अग्रपंक्तिमा रहने अपेक्षा गरिएको छ । विस्साले यस विश्वकपमा २ गोल गरिसकेका छन्, जुन उनले २०२५–२६ को प्रिमियर लिग सिजनभर गरेका गोलभन्दा पनि बढी हो ।

इंग्ल्यान्डको सम्भावित सुरुआती टोलीमा गोलरक्षक जोर्डन पिकफोर्ड रहनेछन् । रक्षापंक्तिमा डिजेड स्पेन्स, एजÞ्री कोन्सा, मार्क गेही र ओ’राइली रहने सम्भावना छ । मिडफिल्डमा इलियट एन्डरसन र डेक्लान राइसले जिम्मेवारी सम्हाल्नेछन् भने आक्रमणमुखी मिडफिल्ड तथा विङमा बुकायो साका, जुड बेलिंघम र मार्कस रासफोर्ड रहने अनुमान गरिएको छ । कप्तान ह्यारी केन एक्लो स्ट्राइकरका रूपमा मैदान उत्रनेछन् । डिआर कंगोेको सम्भावित टोलीमा लियोनेल म्पासी–न्जाउ गोलपोस्टमा रहनेछन् । रक्षापंक्तिमा आरोन वान–बिसाका, एक्सेल तुआन्जेबे, शान्सेल म्बेम्बा, स्टिभ कपुआडी र आर्थर मासुआकु रहने सम्भावना छ । मिडफिल्डमा सामुएल माउटुसामी, नोआ सादिकी र एदो केयेम्बे रहनेछन् भने अग्रपंक्तिमा योआने विस्सा र सेड्रिक बाकाम्बुले जिम्मेवारी सम्हाल्ने अपेक्षा गरिएको छ ।

समग्रमा हेर्दा डिआर कंगोेले यस विश्वकपमा रणनीतिक लचकता र बलियो रक्षात्मक खेल प्रदर्शन गर्दै आफूलाई प्रतिस्पर्धी टोलीका रूपमा स्थापित गरिसकेको छ । पोर्चुगल र कोलम्बियाविरुद्ध पनि ५ सदस्यीय रक्षापंक्तिको सहायताले टोलीले सीमित गोल मात्र बेहोरेको थियो । त्यसैले इंग्ल्यान्डका लागि धेरै गोल गर्ने अवसर सहज हुने देखिँदैन । यद्यपि इंग्ल्यान्डसँग ह्यारी केन र जुड बेलिंघमजस्ता विश्वस्तरीय खेलाडी छन्, जसले खेलको कुनै पनि क्षण नतिजा बदल्न सक्छन् । अनुभव, व्यक्तिगत क्षमता र टोलीको गहिराइका आधारमा इंग्ल्यान्ड यस खेलको प्रमुख दाबेदार मानिए पनि डिआर कंगोेले देखाएको आत्मविश्वास र अनुशासित प्रदर्शनका कारण यो प्रतिस्पर्धा निकै रोचक हुने अपेक्षा गरिएको छ ।