प्रतिपक्षीको अवरोध हटेसँगै प्रतिनिधिसभा बैठक सहज रुपमा सञ्चालन

काठमाडौं । विपक्षी दलहरूको अवरोध हटेसँगै प्रतिनिधिसभा बैठक निर्धारित समयभन्दा एक घण्टा ढिला सुरु भएको छ । आज दिउँसो २ बजेका लागि निर्धारण गरिएको बैठक ३ः१५ बजे सुरु भएको हो । बैठक अहिले सहज रुपमा सञ्चालन भइरहेको छ ।

प्रधानमन्त्री वालेन्द्र शाहले यही जेठ १७ गतेको बैठकमा नेपाल–भारत सीमा सम्बन्धमा दिएको अभिव्यक्तिलाई लिएर प्रतिपक्षी दलहरूले यसबीचका बैठकहरू अवरुद्ध गर्दै आएकोमा सरकारका तर्फबाट त्यस विषयमा आजको बैठकमा प्रष्ट पारिने समझदारीपछि बैठक सुरु भएको हो ।

बैठकमा अहिले आकस्मिक समयमा सांसदहरूले समसामयिक विषयमा ध्यानाकर्षण गराएपछि परराष्ट्र मन्त्री शिशिर खनालले रोष्ट्रमबाट सम्बोधन गरिरहेका छन् ।

आजको बैठकमा अर्थमन्त्री डा स्वर्णिम वाग्लेले वक्तव्यसहित ‘आर्थिक वर्ष २०८३–०८४ को राजस्व र व्ययको वार्षिक अनुमानमाथि सामान्य छलफल प्रारम्भ गरियोस्’ भन्ने प्रस्ताव प्रस्तुत गर्ने कार्यसूची छ ।

बैठकमा आव २०८३–०८४ को राजस्व र व्ययको वार्षिक अनुमानमाथि सामान्य छलफल हुने र छलफलका क्रममा उठेका प्रश्नको अर्थमन्त्रीले जवाफ दिने कार्यसूची छ ।