ठेकेदारले समयमै सडक निर्माण नगरेको भन्दै सिडिओमार्फत प्रधानमन्त्रीलाई ज्ञापनपत्र

म्याद सकिन अब ६ दिन मात्र बाकी रहेको अवस्थामा १० प्रतिशत पनि काम सम्पन्न गर्न नसकेको भन्दै सिडिओमार्फत प्रधानमन्त्रीकाे ध्यानाकर्षण

रौतहट । निर्माण कम्पनीले समयमा सडक निर्माण गर्न नसकेको भन्दै स्थानीयहरुले पूर्व राज्य मन्त्रीको नेतृत्वमा रौतहटका प्रमुख जिल्ला अधिकारीलाई ज्ञापनपत्र बुझाएका छन् । रौतहटको गौर समनपुर सडकखण्ड निर्माणको कार्यमा निर्माण कम्पनी साह निर्माण सेवाले चरम लापरबाही गरेकोले जनता समाजवादी पार्टी नेपालका केन्द्रीय सदस्य एवं मधेश प्रदेशका पूर्व कृषि राज्यमन्त्री योगेन्द्र राय यादवको नेतृत्वमा गएको स्थानीयले मंगलबार जिल्ला प्रशासन कार्यालय रौतहटका प्रमुख जिल्ला अधिकारी हिरालाल रेग्मी मार्फत प्रधानमन्त्रीलाई ज्ञापनपत्र बुझाएका हुन् ।

गौर–समनपुर सडकखण्ड निर्माण गर्ने ठेक्का लिएका साह निर्माण सेवाले म्याद भित्र सडक बनाउनु पर्नेमा सम्झौताको अवधि सकिन लाग्दा पनि निर्माण कार्य सम्पन्न गर्न नसकेको भन्दै स्थानीयहरुले ठेकेदारलाई कार्यवाही गर्नुपर्ने माग राखेका छन् ।

साह निर्माण सेवाले २०७९ असार १७ गते २०८१ भदौ १० गतेसम्म २० करोड ५० लाख भन्दा बढी रुपैयाँमा उक्त सडक कालोपत्रे गर्ने ठेक्का लिएको थियो ।

निर्माण कम्पनीले ठेक्का सकार गरेको म्याद सकिन अब ६ दिन मात्र बाकी रहेको अवस्थामा १० प्रतिशत पनि काम सम्पन्न गर्न नसकेको भन्दै सिडिओ मार्फत प्रधानमन्त्रीलाई आफुहरुले ध्यानाकर्षण गराएको जसपा नेपालका केन्द्रीय सदस्य योगेन्द्र यादवले बताए ।

सडक निर्माणमा निर्माण कम्पनीले चरम लापरबाही गरेको र समयमा सडक निर्माण गर्न नसक्दा हजारौं सर्वसाधारण नागरिक दुख भोग्न बाध्य भएको नेता यादवले बताए ।

मंगलवार ज्ञापनपत्र बुझाएर सम्बन्धीत निकायलाई ध्यानाकर्षण गराएको र आफुहरुको मागबारे सुनुवाइ नभए आउदो भदौ १० गते पछि थप संघर्ष का कार्यक्रम तय गर्ने नेता यादवले बताए ।

रौतहटका प्रदेश सांसद नागेन्द्र साह ठेकेदार रहेका छन् । साहले दुई वर्षमा १० प्रतिशत पनि काम सम्पन्न गर्न नसक्नु ठूलो चिन्ताको विषय रहेको बिज्ञप्तिमा उल्लेख छ ।

ठेकेदार साहले समयमा सडक निर्माण नगरि अल्पत्र छाडेर जनतालाई दुख दिने काम गरेको उनीहरुको भनाइ छ ।

निर्माण कम्पनी साह निर्माण सेवाले समयमा सडक निर्माण नगरि अल्पत्र छाडेका कारण आम नागरिक निकै जोखिम मोलेर उक्त सडकमा आवत जावत गर्न बाध्य रहेको विज्ञप्ति जनाइएको छ ।

निर्माण कम्पनीले उक्त सडकमा कालोपत्रे गर्न ठाउँ ठाउँमा जोतेर पहिला भन्दा अहिले झन खराब बनाइदिएको कारण सवारी साधन र पैदल समेत हिड्न समस्या हुने गरेकोले तुरुन्त उक्त अधुरो सडक निर्माण गर्न स्थानीले माग गरेका छन ।