विमानस्थल बिस्तारमा लागेको भन्दै २ मन्त्रीद्वारा प्रमुख दाहालको प्रशंसा

चितवन । भरतपुर महानगरपालिकाको प्रमुख भएसँगै पहिलो एजेन्डाको रूपमा भरतपुर विमानस्थलको बिस्तार र स्तरोन्नतिलाई लिएकी प्रमुख रेनु दाहाल कामले मूर्तरूप लिँदै गर्दा सबै तिरबाट प्रशंसाको पात्र बनेकी छन् । बिहीबार श्री एयरको जहाज परीक्षण उडानका क्रममा अवतरणपछि उपस्थित २ मन्त्रीसहितका अधिकारीहरूले दाहालको खुलेर प्रशंसा गरे ।

सो अवसरमा उपप्रधान तथा गृहमन्त्री रवि लामिछाने, संस्कृति पर्यटन तथा नागरिक उड्डयन मन्त्री हितबहादुर तामाङ, नागरिक उड्डयन प्राधिकरणका महानिर्देशक ई. प्रदीप अधिकारी लगायतले दाहालको निरन्तरको पहलकदमीले सार्थकता पाएको भन्दै प्रशंसा गरेका थिए ।

मन्त्री तामाङले आगामी आर्थिक वर्षभित्रै भरतपुर विमानस्थलको बिस्तार भइसक्ने बताए । मन्त्री तामाङले यसै वर्ष धावनमार्गको विस्तार, नयाँ टर्मिनल भवनको निर्माण सकेर भरतपुर विमानस्थललाई चौबिसै घण्टा चलाउने बताए ।

‘मेयरको अनवरत प्रयास, प्रधानमन्त्रीको पहल र सहयोग, विभागीय प्रमुखको दिलचस्वीले छिट्टै सबै काम हुँदै छ । यति चाँडै यो हदसम्मको प्रगति हुन्छ भन्ने चितवनवासीले सोचेका थिएनन् होला’, मन्त्री तामाङले भने । उनले थपे, ‘सकभर कुनै बाधा, अवरोध पैदा हुन नदिने, निर्माण व्यवसायीलाई छिटोभन्दा छिटो काम गर्ने वातावरण बनाइदिने काम हामी गर्छौं ।’

गृहमन्त्री लामिछानेले यसले यहाँको पर्यटन प्रवद्र्धनमा महत्वपूर्ण योगदान पुग्ने बताए । उनले आफू अन्त्यमा आएर जोडिएको भन्दै सुरुआतदेखि निरन्तर लागिरहेका भरतपुर महानगरप्रमुख रेनु दाहाललगायत सबैलाई धन्यवाद दिए ।

नागरिक उड्डयन प्राधिकरणका महानिर्देशक प्रदीप अधिकारीले रन वे बढाएर भरतपुर विमानस्थलको स्तरोन्नतिको काम सुरु हुन लागेको, नयाँ टर्मिनल भवन बनिरहेको अवस्थामा ठुलो क्षमताको जहाज आउन लागेको बताए । स्थानीय सरकारको तर्फबाट प्रमुख दाहालले निरन्तर घचघच्याएका कारण काम छिटो भएको बताएका थिए ।

असार मसान्तसम्म प्राधिकरणको बजेट पास हुने साउनमा विमानस्थलको बिस्तारका लागि टेन्डर आह्वान हुने उनले बताए । ‘ढिलोमा सन् २०२५ को जनवरीसम्ममा बिस्तार भइसक्छ’, उनले भने, ‘त्यसपछि भरतपुरमा रात्रिकालीन सेवा सुरु हुन्छ । चौबिसै घण्टा जहाज अवतरण गर्न सकिन्छ । अहिले परीक्षण भइरहेको ८० सिटको जहाज मात्रै होइन जेट पनि अवतरण हुनसक्छ ।’

उनले विमानस्थलको स्तरोन्नतिपछि बुद्ध, यती लगायतका एयरलाइन्सका एटिआर–७२ जहाजहरू पनि अवतरण हुनसक्ने बताए । हाल १ हजार २०० मिटर लामो धावनमार्ग रहेको भरतपुर विमानस्थललाई नजिकै रहेको नेपाली सेनाको घोडा प्रजनन् केन्द्रसम्म बिस्तार गरेर धावनमार्ग १ हजार ८०० मिटर बनाउने लक्ष्य छ । यसका लागि गत माघ १८ गतेको मन्त्रिपरिषद्को बैठकले निर्णय गरिसकेको छ ।

भरतपुर महानगरपालिकाका प्रमुख रेनु दाहालले निरन्तरको प्रयासपछि विमानस्थलको बिस्तार, टर्मिनल भवनको निर्माण र ठुलो क्षमताको जहाज अवतरण एकै साथ हुन लागेको बताए । ‘७ वर्षमा ७ भन्दा बढी मन्त्री फेरिए । सबैसँग निरन्तर समन्वय, सक्रिय पहल गरियो । यसपटक संघीय सरकारको बजेटमा भरतपुर विमानस्थलको बिस्तार, घोडा प्रजनन केन्द्र स्थानान्तरण लगायतका काम गर्न बजेट विनियोजन भएको छ’, उनले भने, ‘यो भन्दा खुसीको कुरा के हुन्छ र, सपना साकार भएको छ ।’

उनले विमानस्थल विस्तार भएसँगै धेरै जहाज अवतरण हुने र प्रतिस्पर्धा बढेर भाडा कम लाग्ने बताइन् । ‘देशको केन्द्रमा रहेको, आर्थिक विकासको केन्द्र रहेको ठाउँमा विमानस्थलको क्षमता विस्तार हुने आवश्यक छ । यहाँ अन्तर्राष्ट्रिय क्रिकेट रंगशाला, सिटी हल बनिरहेका छन् । मेडिकल हब, कृषिको उर्वर क्षेत्र भएकाले विमानस्थललाई स्तरोन्नति गर्नै पर्ने थियो’, उनले थपिन् ।

प्रमुख दाहालले संघीय सरकारबाट नयाँ आधुनिक टर्मिनल भवन निर्माण गर्न करिब २ अर्ब, घोडा प्रजनन केन्द्रलाई शक्तिखोरमा सार्न डेढ अर्ब र धावन मार्ग बिस्तारका लागि करिब १ अर्ब रुपैयाँ विनियोजन भएको जानकारी दिइन् ।

‘यसका लागि हामीले निकै मिहिनेत गरेका छौँ । पहिलो नगरसभाबाट लगातार विमानस्थल बिस्तारको विषयलाई प्राथमिकतामा पारेका छौँ’, प्रमुख दाहालले भनिन्, ‘यो बीचमा महानगरको अग्रसरतामा प्रधानमन्त्री निवास, प्रधानमन्त्री कार्यालय, पर्यटन मन्त्रालय, रक्षा मन्त्रालयलगायत धेरैतिर बैठक गरियो । ठूलो प्रयासपछि सफल भएका छौँ ।’

भरतपुर विमानस्थलका प्रबन्धक दीपक विकका अनुसार यो विमानस्थलको विस्तारका लागि सबैभन्दा पहिले २०७५ सालको माघ २० गते औपचारिक बैठक बसेको थियो । तत्कालीन पर्यटन मन्त्री रविन्द्र अधिकारी, प्रमुख दाहाल लगायतको उपस्थितिमा विमानस्थलको कार्यालयमा बसेको बैठकले बिस्तारका लागि प्रयास गर्ने निर्णय गरेको थियो । यसअघि महानगरपालिकाको कार्यपालिकाको बैठकले विमानस्थल बिस्तार र स्तरोन्नतिका लागि पहल गर्ने निर्णय गरेको थियो ।

२०७६ भदौ २८ गते प्रमुख दाहालको अध्यक्षतामा भरतपुर महानगरपालिकाको कार्यालयमा बसेको बैठकमा प्रधानमन्त्री पुष्पकमल दाहाल (त्यतिखेर पूर्वप्रधानमन्त्री), तत्कालीन पर्यटन मन्त्री योगेश भट्टराई, बागमती प्रदेशका मुख्यमन्त्री डोरमणि पौडेललगायत उपस्थित थिए । उक्त बैठकले विमानस्थलको स्तरोन्नतिका लागि नजिकै रहेको नेपाली सेनाको गणलाई स्थानान्तरण गर्न वैकल्पिक स्थानको खोजी गर्ने निर्णय गरेको थियो ।

यस विषयमा प्रतिवेदन तयार पार्न पर्यटन मन्त्रालयले सह–सचिव बुद्धिसागर लामिछानेको संयोजकत्वमा समिति बनाएको थियो । लामो प्रयासपछि २०८० माघ १८ गतेको मन्त्रिपरिषद्को बैठकले विमानस्थलको बिस्तार गर्ने निर्णय गरेको हो ।

नेपाल सरकारले आगामी आर्थिक वर्षको बजेटमा पनि समावेश गरेपछि भरतपुर विमानस्थलको बिस्तार हुने निश्चित भएको प्रमुख दाहालले बताइन् ।