विद्यालय सरकारी तर पढाइको माध्यम अंग्रेजी

फिक्कल । अधिकांश अभिभावक आफ्ना बालबालिकाहरूलाई अंग्रेजी माध्यमबाट पढाउनकै लागि निजी विद्यालय रोज्छन् । सहरी क्षेत्रका अभिभावकलाई त सहज नै छ, घरबाट नजिकै प्रसस्तै निजी विद्यालयहरू पाइन्छन् । ग्रामीण क्षेत्रमा नजिकै निजी विद्यालय नहुने भएका कारण बालबालिका पढाउन सहर नै पस्नुपर्ने अवस्था भए पनि इलामको चुलाचुली गाउँपालिकामा त्यस्तो बाध्यता छैन ।
गाउँपालिकाका सबै सरकारी विद्यालयमा अंग्रेजी माध्यमबाट पढाउन थालेपछि त्यस्तो बाध्यता हटेको हो । चुलाचुली गाउँपालिकाले सबै सरकारी विद्यालयमा आधारभूत तह कक्षा–५ सम्म अंग्रेजी माध्यमबाट पठनपाठन सुरु गरेको छ ।

सरकारी विद्यालयमै अंग्रेजी माध्यममा पढाइ हुन थालेपछि बालबालिकालाई अंग्रेजी माध्यम पढाउनकै लागि सहर पसेका अभिभावकहरू समेत गाउँ फर्कन थालेका छन् । सरकारी विद्यालयमा विद्यार्थीको आकर्षणसमेत बढ्न थालेको छ ।
सरकारी विद्यालयमा नेपाली माध्यमबाट पढाइ हुने र अभिभावकको चाहना अंग्रेजीमाध्यम बन्दै गएकाले सरकारी विद्यालयमा समेत अंग्रेजी माध्यमबाट पठनपाठन गराउने व्यवस्था गरिएको गाउँपालिका अध्यक्ष राजेन्द्र केरुङले बताए । ‘अंग्रेजी माध्यमबाट पढाउन अब अभिभावकहरूले निजी विद्यालयको भरपर्नु पर्दैन’, अध्यक्ष केरुङले भने, ‘स्थानीय सरकारले अभिभावकको अंग्रेजी माध्यमको चाहनालाई मध्यनजर गर्दै सरकारी विद्यालयमा पनि अंग्रेजी माध्यमबाट पठनपाठन सुरु गरिएको हो ।’

गाउँपालिकाले प्रत्येक विद्यालयमा अंग्रेजी माध्यमबाट पठनपाठन गराउन अनुदान कोटामा शिक्षक दिएको छ । अंग्रेजी माध्यमका लागि गाउँपालिकाले २५ जना निजी शिक्षक नियुक्त गरी अनुदान दिँदै आएको छ । सबै विद्यालयमा पूर्वप्राथमिक तहमा निजी विद्यालयमा जस्तै नर्सरी, एलकेजी र युकेजी कक्षासमेत सञ्चालन गर्दै आएको छ । तीन तहका विद्यार्थीलाई गाउँपालिकाले निःशुल्क पाठ्युस्तक र पाठ्यसामग्री उपलब्ध गराउँदै आएको छ ।

शिक्षा क्षेत्रमा देखिएका कमीकमजोरीलाई क्रमिक रूपमा सुधार गर्दै लैजाने योजनाअनुसार पहिलो काम अंग्रेजी माध्यमबाट पठनपाठन सुरु गरिएको शिक्षा शाखा प्रमुख राम मिश्रले बताए । ‘सरकारी विद्यालयमा विद्यार्थीको आकर्षण बढाउन सबै विद्यालयमा अंग्रेजी माध्यमबाट पठनपाठन सुरु गरिएको हो । यसका लागि गाउँपालिकाले शिक्षक अनुदान दिएको छ’, उनले भने, ‘अहिले निजी विद्यालय छाडेर सरकारी विद्यालयमा विद्यार्थी आउन थालेका तथ्यांक प्राप्त भएको छ ।’ अंग्रेजी माध्यमबाट अध्यापन भएपछि निजी विद्यालय र सरकारी विद्यालयमा फरक नहुने समाजमा स्थापित हुँदै गएको समेत उनले बताए ।

आफ्ना छोराछोरीलाई गाउँकै सरकारी विद्यालयमा अंग्रेजी माध्यममा पढ्न पाएपछि अभिभावकहरू समेत खुसी भएका छन् । हुन त धेरै अभिभावकहरूले आफ्ना बालबालिकाहरू देखासिखी वा फेसनका रूपमा भए पनि चर्को शुल्क तिर्न बाध्य भइरहेको परिस्थितिमा सरकारी विद्यालयमा पढाउन पाउने भएकाले आजभोलि अभिभावकहरू निकै खुसी हुनु स्वभाविक हो ।

चुलाचुली गाउँपालिका–१ कि विशु राई सरकारी विद्यालयले अंग्रेजी माध्यममा पढाइ सुरु गरेकाले आफूलाई निकै खुसी लागेको बताउँछिन् । उनले थप्दै भनिन्, ‘न्यून आय भएकाहरूलाई सरकारी स्तरबाट गरेको यो प्रयास सह्रानीय छ । यसलाई निरन्तरता दिएर जानुपर्छ ।’ त्यसैगरी अर्का अभिभावक अनिस राईले सरकारी विद्यालयमा अंग्रेजी माध्यममा अध्यापन हुन थालेपछि खुसी लागेको बताइन् । उनले घर नजिकैको सरकारी विद्यालयमा अंग्रेजी माध्यम लागू भएपछि आफ्नो निजी विद्यालय पढ्दै गरेको बच्चालाई समेत सरकारी विद्यालयमा ल्याएका छन् ।

धेरै अभिभावकहरूले आफ्ना बालबालिकाहरूलई गुणस्तरीय शिक्षाका लागि चर्को शुल्क तिरेर निजी विद्यालयमा पठाउन बाध्य भइरहेको परिस्थितिमा सरकारी विद्यालयमा अंग्रेजी माध्यममा पढाउन पाउने भएकाले यस क्षेत्रका अभिभावकहरू खुसी भएका हुन् । सरकारी विद्यालयमा अंग्रेजी माध्यम लागू गरेपछि विद्यार्थी संख्यासमेत बढेको वडा–१ कमलस्थित जनता माध्यमिक विद्यालयका सहायक प्रधानाध्यापक विशाल लिम्बू बताउँछन् । ‘अंग्रेजी माध्यममा पठनपाठन सुरु गरेपछि झण्डै १५ प्रतिशत विद्यार्थी संख्या बढेको छ’, उनले भने, ‘कतिपय अभिभावकहरूले त आफ्ना छोराछोरी बोर्डिङबाट निकालेरसमेत यहाँ ल्याएका छन् ।’

चुलाचुली गाउँपालिकामा आठ माध्यमिक, १३ आधारभूत, दुई सामुदायिक सिकाइ केन्द्र र १६ वटा बालविकास केन्द्र छन् । सबै तहमा पाँच हजार विद्यार्थी अध्ययरत रहेको गाउँपालिका शिक्षा शाखाको तथ्यांकमा उल्लेख छ । उता निजीतर्फ एउटा माध्यमिक र पाँच वटा आधारभूत विद्यालय छन् ।

शैक्षिक संरचनामा ६ करोड बढी लगानी

चुलाचुली गाउँपालिकाको शैक्षिक क्षेत्र सुधार गर्नका लागि जनप्रतिनिधि र कर्मचारी तल्लीन छन् । गाउँपालिकाले वार्षिक नीति तथा कार्यक्रममा शैक्षिक क्षेत्रलाई प्रमुख प्राथमिकतामा राखेर बजेट विनियोजन गर्ने गरेको छ । शैक्षिक सुधारका लागि पछिल्लो दुई वर्षमा ६ करोड रुपैयाँ बढीको विभिन्न शैक्षिक संरचनाहरू तयार भएका छन् । गाउँपालिकाका सात वटा विद्यालयमा पक्की भवन निर्माण सम्पन्न गरिएको छ भने दुई वटाको निर्माण सम्पन्नको चरणमा रहेको गाउँपालिका अध्यक्ष केरुङले जानकारी दिए ।

वडा–२ स्थित जनता माध्यमिक विद्यालयमा प्राविधिक शिक्षा (सिभिल इन्जिनियरिङ) को पढाइ भइरहेको छ । स्थानीयस्तरमा जनशक्ति उत्पादन गर्ने उद्देश्यले प्राविधिक शिक्षाको पढाइ सुरु गरिएको प्रधानाध्यापक लक्ष्मीश्वेरप्रसाद बनबरिया यादवले बताए । सो विद्यालयमा सिभिल इन्जिनियरिङका एक सयसहित करिब सात सय विद्यार्थी अध्ययनरत छ ।

सो विद्यालयलाई गाउँपालिकाले स्कुल बस उपलब्ध गराएको छ । ४१ लाख ६९ हजारमा स्कुलबस खरिद गरी विद्यालयलाई हस्तान्तरण गरिएको उनले जानकारी दिए । ‘हामी सरकारी विद्यालयलाई अब्बल बनाउँदै शैक्षिक गुणस्तर सुधार गर्ने अभियानमा जुटेका छौँ’, अध्यक्ष केरुङले भने, ‘सिभिल इन्जिनियर अध्ययनरत विद्यार्थीसहित अन्य विपन्न वर्गका विद्यार्थीको शिक्षामा सहज पहुँचको लागि बस सेवाले टेवा पुग्ने हाम्रो विश्वास छ ।’

गाउँपालिकाबाट विद्यालयलाई स्कुल बस प्राप्त भए पनि सम्पूर्ण सञ्चालनको जिम्मा विद्यालयले नै लिएर सञ्चालन गरिएको प्रधानाध्यापक यादवले बताए । बसको सुविधाले छिमेकी जिल्ला झापाको दमक, केर्खालगायत क्षेत्रबाट आउने विद्यार्थीसमेत लाभान्वित भएका छन् । सो विद्यालयमा प्राविधिक शिक्षातर्फ कोशी प्रदेशका सबै जिल्ला र मधेस प्रदेशका सिराहा, सप्तरी, सर्लाहीलगायत जिल्लाका विद्यार्थी छन् । उनीहरू झापाको दमकमा बसेर बिहान कक्षा लिन चुलाचुली आउने गर्दछन् ।

चार विद्यालयमा लिम्बू भाषा पठनपाठन

त्यस्तै, चुलाचुली गाउँपालिकाले मातृभाषा शिक्षासमेत लागू गरेको छ । चुलाचुली गाउँपालिकाले चार वटा विद्यालयमा स्थानीय मातृभाषा लिम्बू भाषा पठनपाठन गर्दै आएको छ । चुलाचुली गाउँपालिका–१ मा जनता माध्यमिक विद्यालय, फाल्गुनन्द बहुभाषिक लफाङ पाठशाला र शिवज्योति आधारभूत विद्यालय तथा वडा–४ स्थित किरात चोलुङ आधारभूत विद्यालयमा लिम्बू भाषा पठनपाठन भइरहेको शिक्षा शाखा प्रमुख मिश्रले जानकारी दिए ।

गाउँपालिकाले मातृभाषा शिक्षाका लागिसमेत एक/एक जना भाषा शिक्षकका लागि अनुदान उपलब्ध गराएको छ । गाउँपालिकाको वार्षिक नीति तथा कार्यक्रममा नै उल्लेख गरी भाषा शिक्षकका लागि सेवा सुविधा उपलब्ध गराउँदै आएको गाउँपालिका अध्यक्ष केरुङले बताए ।