काठमाडौं । गैरआवासीय नेपाली संघ (एनआरएनए) का राष्ट्रिय समन्वय परिषद् (एनसिसी) पोर्चुगलको निर्वाचन आगामी जुलाई ३० का लागि तय भएको छ । सोही निर्वाचनमा लिस्बनमा बस्दै आएका युवा सुनिल मल्ल ठकुरीले एनआरएनए पोर्चुगलको वरिष्ठ उपाध्यक्षमा उम्मेदवारी घोषणा गरेका छन् ।
चुनावको मिति नजिकिँदै गर्दा वरिष्ठ उपाध्यक्षमा उम्मेदवार सुनिल मल्ल ठकुरीले प्रचारप्रसारलाई तीव्रता दिएका छन् । नेपाली राष्ट्रिय रग्बी टोलीका पूर्वखेलाडीसमेत सुनिलले उम्मेदवारी घोषणा गरेसँगै विभिन्न ठाउँमा पुगेर नेपाली समुदायहरूसँग छलफल र अन्तरक्रिया गरिरहेका छन् ।
नेपालले कतारमा भएको अन्तर्राष्ट्रिय रग्बी प्रतियोगिता खेल्नुका साथै तत्कालीन मध्यमाञ्चल र गोर्खाली रग्बी क्लबबाट राष्ट्रिय प्रतियोगितासमेत जितेका थिए । युवा उम्मेद्वारी सुनिल मल्ल ठकुरी नेपालमा रहँदा मार्सल आट्सका विभिन्न विधा खेलाडीसमेत हुन् ।
खेलकुद पृष्ठभूमिबाट आएका उनलाई एनआरएन पोर्चुगलको वरिष्ठ उपाध्यक्षमा बलियो दाबेदारको रूपमा हेरिएको छ । संस्थागत रूपान्तरणः सामाजिक एकता, सबैको एनआरएनए हाम्रो प्रतिबद्धता’ भन्ने मूल नारा लिएर उनी चुनावी मैदानमा उत्रिएका छन् ।
निस्वार्थ सेवा, नेपाली समुदायमा एकता र सबैको साझा एनआरएनए बनाउने उद्देश्यअनुरूप पोर्चुगलमा रहेका नेपाली समुदायबीच गएकाले आफूले जित्ने उनको विश्वास छ । युवाहरू नेतृत्वमा आउनुपर्छ भन्ने धारणा सबैको रहेकाले पनि आफ्नो जित हुने उनको विश्वास छ ।
नेपालीहरूका लागि युरोपको सबैभन्दा बढी रोजाईको गन्तव्य पोर्चुगल बन्दै गए पनि उनीहरूले आफ्नो समुदायबाट साथ सहयोग पर्याप्त नपाएको गुनासो आइरहेको समयमा आफूले संस्थागत रूपमा पुलको काम गर्ने ठकुरीले बताए । आफू युवा र विभिन्न समाजलाई केन्द्रित गरेर अघि बढ्ने योजनामा रहेको युवा उम्मेद्वार ठकुरीको भनाइ छ ।
सबैसँग सहकार्य गरेर आफू दृढ संकल्पका साथ चुनावी मैदानमा उत्रिएको पनि ठकुरीले बताएका छन् । आफ्नो जित भएमा रोजगारी र पेशागत विकासजस्ता निश्चित विषयहरूमा एनसिसी पोर्चुगलबाट प्रशिक्षण दिलाउने कार्यक्रमहरू अगाडि बढाउने उनको लक्ष्य छ ।
उम्मेद्वारी सुनिलले नेतृत्वमा नरहँदा पनि नेपाली समुदायलाई अफ्ठयारो परेका समयमा सहयोग गर्दै आएको र उनको सरल तथा मिलनसार शैलीका कारण धेरै नेपाली प्रभावित भएकाले पनि उनले जित्न सक्ने आधार रहेको लिस्बनमा बस्दै आएका युवाहरू रामेश्वर बर्तौला र सन्जय बर्तौला बताउँछन् ।
प्रतिक्रिया