नीरफूलमा मौलिक कथा

काठमाडौं । तामाङ संस्कृति समेटिएको चलचित्र ‘नीरफूल’ जेठ २६ गतेदेखि देशव्यापी प्रदर्शनमा आउने तयारीमा छ । तामाङ समुदायमार्फत कथावाचन गरिएको भए पनि यो जनजातिको मात्र कथा नरहेको चलचित्रका निर्देशक फूलमान वलले बताए । नेपाली चलचित्रमा पछिल्लो समय समुदायको कथाले पनि स्थान पाउन थालेको छ । क्षेत्रीय चलचित्रको रूपमा मात्र सीमित हुने ती कथाले अहिले मूलधारमा प्रवेश पाएका छन् । अर्थात् परिचित अनुहारले ती कथालाई धेरै दर्शकसम्म पु¥याएका छन् ।

निर्देशक बलले राजधानीमा आयोजित पत्रकार सम्मेलनमा भने, ‘चरित्रहरू तामाङ समुदायको भए पनि यसमा तामाङ संस्कृति मात्र देखाउने उद्देश्य होइन । कथा उत्पत्ति भएको ठाउँ तामाङ समुदाय हो तर यो परिवारको बिछोड र मिलनको कथा हो । यो कथालाई हरेक समुदायको मानिसले महसुस गर्न सक्नुहुन्छ ।’ उनले समीक्षक हुँदै निर्देशकसम्मको यात्रा तय गर्दा कमीकमजोरीलाई बुझ्न मदत पुगेको बताए । दुई दशक लामो पत्रकारिता यात्रापश्चात् निर्देशनमा लागेका बलले यो यात्रा समीक्षक भएकै कारण सम्भव सुनाए । उनले भने, ‘समीक्षक रहँदा अन्य चलचित्रमा देखिएको कमीकमजोरीलाई केही हदसम्म बुझ्ने मौका पाएको थिएँ । सकभर त्यो गल्ती नगर्ने कोसिस गरेको छु । नेपाली चलचित्रमा खोजिएको नयाँपन यसमा हुन् सक्छ । यसमा हाम्रो कथा र व्यथा छ ।’

चलचित्रका अभिनेता दयाहाङ राईले विस्तारै नेपालका विविध संस्कृतिले चलचित्रमा मूलरुपमै स्थान पाउन थालेको बताए । उनले भने, ‘यो जरुरी पनि थियो । किनकि हामीसँग हाम्रो मौलिक कथा धेरै छन् । नीरफूलजस्ता चलचित्रले कथामा विविधता ल्याउँछन् ।’ बलले यस्ता चलचित्रको महत्व कालान्तरमा अझै बढी हुने बताए ।

हिमाली भेगमा छायांकन गर्नुपर्ने भएकाले धादिङको रुबी भ्यालीमा छायांकन गरिएको निर्देशक बलले जानकारी दिँदै भने, ‘हामीलाई हिउँ नभएको हिमाली भूभाग चाहिएको थियो । त्यहीँ क्रममा त्यहाँ पुग्दा छायांकन गर्ने तय गर्यौं ।’
अभिनेता दयाहाङ राईले सन् १९४८ मा बनेको इटालियन नवयथार्थवादी चलचित्र ‘द बाइसाइकल थिफ’ र सत्यजित रेको ‘पाथेर पाञ्चली’ जस्ता सधैँ बाँचिरहने चलचित्र ‘नीरफूल’ बनेको जिकिर गरे । उनले भने, ‘यसले हाम्रै समाजको कथालाई हाम्रै सुन्दर दृश्यमार्फत व्यक्त गरेको छ । यसमा हामीले भोगेको समयको कथा भेटिनेछ ।’

भूकम्पका कारण बिछोडिएका एक परिवारको सदस्यले पुनर्मिलनका लागि गरेको प्रयत्नमा आधारित रहेको चलचित्रमा अभिनेता राईसँगै रेखा थापा, शान्ति वाइबा, बुद्धि तामाङ, पुष्कर गुरुङ, जिम्मे छ्योइकी घिसिङ, राजन खतिवडा, सरोज अर्याल, सरिता गिरीलगायतको अभिनय रहेको छ । चलचित्रमा पटकथा लेखन निर्देशक वल र सचिन घिमिरे, छायांकन प्रमोद कार्की, सम्पादन निमेश श्रेष्ठ, संगीत सिर्जना अर्जुन पोखरेल र चन्द्रकुमार दोङले गरेका छन् ।