तनहुँमा डेंगु संक्रमितको संख्या बढ्दै

डुम्रे । चिसो मौसम सुरु हुँदा पनि तनहुँमा डेंगुको संक्रमण बढ्दो क्रममा छ । डेंगु संक्रमितको संख्या बढेपछि सदरमुकामस्थित अस्पतालहरुमा संक्रमितको भीड लागेको छ ।

कात्तिकमा मात्रै ८८ जनामा संक्रमण देखिएको दमौली अस्पतालका प्रमुख डा. दिवस ढकालले जानकारी दिए । उनका अनुसार २१५ जनाको नमूना परीक्षणमा सबैमा डेंगु संक्रमण देखिएको हो ।

जिल्लामा भदौको अन्तिम सातादेखि डेंगुको संक्रमण फैलिएको थियो भने असोजमा मात्रै एक सय एक जनामा संक्रमण पुष्टि भएको डा. ढकालले बताए । डेंगुको संक्रमण हुँदा उच्च ज्वरो आउने, जोर्नी र मांसपेशी दुख्ने, आँखाको गेडी र टाउको दुख्ने जस्ता लक्षण देखिने उनको भनाइ छ ।

डेंगुको संक्रमण बढ्दै गएपछि नियन्त्रणको प्रयास भइरहेको स्वास्थ्य कार्यालय तनहुँका प्रमुख शंकरबाबु अधिकारीले जानकारी दिए । डेंगुबाट बच्न जिल्लाका १० वटै स्थानीय तहले लामखुट्टेको बासस्थान मास्ने, सरसफाई लगायतको सचेतनात्मक कार्यक्रम समेत सञ्चालन भइरहेको अधिकारीले बताए ।

डेंगु लामखुट्टेको टोकाइबाट सर्ने भएकाले आफ्नो घर वरिपरी पानी जम्न नदिने, सफा राख्न स्वास्थ्य कार्यालयले सबैसँग आग्रह गरेको छ । साथै डेंगुसँग मिल्दाजुल्दा लक्षण देखिने बित्तिकै चेक जाँच गराउन कार्यालयले अनुरोध गरेको छ ।

‘रोग नियन्त्रण, न्यूनिकरण र रोकथामका लागि लामखुट्टेले फूल पार्ने ठाउँहरु खोजौँ र नष्ट गरौँ भन्ने नारा सहित अभियान सञ्चालन गरिएको छ,’ अधिकारीले भने, ‘लामखुट्टेको बासस्थान नष्ट पार्नु नै सबैभन्दा प्रमुख रोकथामको उपाय हो ।’

एडिस एजिप्टाई जातको पोथी लामखुट्टेको टोकाइबाट मानिसमा डेंगु संक्रमण हुने चिकित्सकहरू बताउँछन् । एडिस लामखुट्टेले मानिसलाई दिउँसो मात्र टोक्छ ।