पोखरामा हारको लाज छोप्न एमालेको ‘कारवाही नौटंकी’

काठमाडौं । एमालेले जित्ने खातामा राखेको पोखरा महानगरपालिकामा पराजय भएपछि अन्तरघात भएको भन्दै कारवाहीको श्रृंखला चलाएको छ ।

नेकपा एमाले कास्कीले पोखरा महानगरपालिकाका मेयर उम्मेदवार कृष्ण थापालाई हराउन खुलेआम गठबन्धनका उम्मेदवारको पक्षमा अभियान चलाएको अडिओ रेकर्डका आधारमा तीनजना कार्यकर्तालाई कारवाही गरेको छ ।

उक्त कारवाहीमा पर्नेमा मनोज पहारी, महेश अर्याल र प्रशान्त आचार्य रहेका छन् । पहारीले प्रदेश सांसद राजीव पहारीको समेत नाम लिँदै विपक्षी दलका उम्मेदवार धनराज आचार्यलाई जिताउन टेलिफोनमा पैसाको समेत लेनदेन गरेको अडिओ सार्वजनिक भएको थियो ।

उनले आफूलाई राजीव पहारीको स्वकीय सचिवसमेत बताउने गरेकोमा पहारीले भने उनी स्वकीय सचिव नरहेको बताएका छन् । मनोज पहारीलाई संगठित सदस्यबाट लिनम्बन गरिएको छ ।

त्यस्तै पोखरा ३३ वडाका उपाध्यक्ष महेश अर्याललाई पदीय जिम्मेवारीसहित संगठित सदस्यबाट समेत निलम्बन गरिएिको जिल्ला अध्यक्ष मनबहादुर गुरुङले प्रेस विज्ञप्तिमार्फत जनाएका छन् ।

एमालेले पोखरा ३३ कै अर्का कार्यकर्ता प्रशान्त आचार्यलाई पनि निलम्बन गरेको छ । पोखरा महानरमा एमालेबा मेयरका उम्मेदवार हराउन जिम्मेवार नेता कार्यकर्ता नै खुलेर लागेको र विपक्षी उम्मेदवार धनराज आचार्यसँग विभिन्न युवा समूह र अन्य क्लबका नाममा पैसा लिएको आरोप छ ।

नेकपा एमाले कास्कीले पोखरा महानगरपालिकाका मेयर उम्मेदवार कृष्ण थापालाई हराउन खुलेआम गठबन्धनका उम्मेदवारको पक्षमा अभियान चलाएको अडिओ रेकर्डका आधारमा तीनजना कार्यकर्तालाई कारवाही गरेको बताइएको छ ।

गत बैशाख ३० मा भएको स्थानीय तहको निर्वाचनमा एकीकृत समाजवादीका धनराज आचार्यले ५८ हजार ८ सय ९३ ल्याएर विजयी भएका थिए । उनका निकटतम प्रतिस्पर्धी एमालेका कृष्ण थापाले ५२ हजार ८ सय ४८ मत ल्याएका थिए ।