सबै वडामा ‘महिला सेल’ गठन गर्ने उपमेयर सुनिताकाे पहिलो निर्णय

काठमाडाैं । काठमाडौं महानगरपालिकाकी उपमेयर सुनिता डंगोलले पदबहाली गरेलगत्तै आफ्नो चुनावी प्रतिबद्धता अनुसार काम गर्न थालनी गरेकी छन् ।
उनले पदबहालीपछि हिंसा र अन्यायमा परेका पीडित महिलाको संरक्षण, आवश्यक कानूनी सहयोग तथा सहजीकरण र आत्मरक्षा तालिम लगायतको व्यवस्थापनका लागि महानगरपालिकाका सबै वडामा महिला सेल (वुमन सेल) गठन गर्ने प्रक्रिया अघि बढाउने निर्णयमा हस्ताक्षर गरेकी छन् ।

सबै वडामा गठन भएको महिला सेलले न्यायिक समितिसँग समेत समन्वय गरी अन्यायमा परेका र पीडित महिलाहरूका लागि आवश्यक कार्य गर्ने लक्ष्य राखिएको छ । ‘सभ्य र शान्त समाज निर्माणका लागि वुमन सेल आवश्यक छ भनेर यसलाई प्राथमिकतामा राखेको हो,’ उनले भनिन् ।

डंगोलले पदबहालीपछि मेलमिलापकर्तालाई आह्वान गर्न मेलमिलापको सूची अध्यावधिकका लागि सूचना प्रकाशन गर्ने पत्रमा हस्ताक्षर गरेकी छन् ।
उनले मेलमिलाप केन्द्र पनि प्रत्येक वडामा गठन गरी सानातिना विवादलाई वडा तहबाटै निरूपण गर्ने उद्देश्यले मेलमिलाप केन्द्रहरूलाई थप प्रभावकारी बनाउने बताइन् ।

स्थानीय सरकार सञ्चालन ऐन २०७४ को दफा ४७ मा उल्लेखित विवादको निरुपण गर्दा न्यायिक समितिले मेलमिलापलाई प्राथमिकता दिई गर्नुपर्ने मेलमिलाप गराउँदा ऐनको दफा ४९ को उपदफा (३) बमोजिम न्यायिक समितिले सूचीकृत गरेका मेलमिलापकर्ताबाट गराउनुपर्ने कानूनी व्यवस्था रहेकाले प्रक्रिया अनुसार अघि बढ्ने पनि उनले बताइन् । सहमति, सहकार्य र सहअस्तित्वको सिद्धान्तलाई आत्मसाथ गर्दै अघि बढ्ने पनि प्रतिबद्धता उनले व्यक्त गरिन् ।