लुम्बिनी प्रदेशसभा सदस्य चढेको गाडी दुर्घटना

देउखुरी । राष्ट्रियसभा सदस्य निर्वाचनमा सहभागी हुन आज दाङको घोराही आउँदै गर्दा लुम्बिनी प्रदेशसभा सदस्य तुलसी चौधरी दुर्घटनामा घाइते भएका छन् ।

उनी सवार शुद्धोदन गाउँपालिकाको बा २ झ ३४४४ नम्बरको स्कारपिओ गाडी गढवा गाउँपालिकाको कालाकाँटेमा लु १ प २५८४ नम्बरको ट्रकसँग ठक्कर खाएको थियो । उनको हातमा सामान्य चोट लागेको जिल्ला प्रहरी कार्यालय दाङका प्रहरी प्रवक्ता मुकुन्द रिजालले जानकारी दिए ।

सो गाडीमा सवार गाउँपालिका अध्यक्ष किशुचन्द चौधरी र उपाध्यक्ष शान्तादेवी ज्ञवाली पनि घाइते भएका छन् । घाइते दुवै जनाको भालुवाङ अस्पतालमा उपचार भइरहेको र अवस्था सामान्य रहेको प्रहरीले जनाएको छ ।