सञ्चार सेवा अवरुद्ध हुँदा तीन जिल्ला प्रभावित

जाजरकोट । मौसममा देखिएको परिवर्तनसँगै जाजरकोटलगायत तीन जिल्लाको सञ्चार सेवा अवरुद्ध भएको छ । विगत एक सातादेखि लगातारको वर्षाका कारण मछाइनास्थित रिपिटर टावरको सोलार चार्ज नहुँदा जिल्लाको फोन सञ्चार सेवा अवरुद्ध भएको हो । जिल्लाभरि दर्जन बढी नेपाल टेलिकमका टावर सञ्चालनमा छन् । तर सबै टावरले दिनभर काम गरेको छैन । जिल्लाको मुख्य रिपिटर टावरमै विद्युत् नहुँदा जिल्लाभरि सञ्चार सेवा अवरुद्ध भएको छ । जिल्लाको मछाइनास्थित रिपिटर टावर भएर नै जिल्लाको ६ स्थानीय तह, रुकुम पश्चिम आठबीसकोट नगरपालिकाको रातामाटा र डोल्पाको कालिकास्थित टावरहरूमा सञ्चार हुने गर्छ । तर मुख्य टावर नै घामको भरमा सञ्चालन हुने भएपछि ती स्थानका सञ्चार अवरुद्ध भएको नेपाल टेलिकम जाजरकोटका प्रमुख गोपीन्द्र अधिकारीले बताए । टावर भएको ठाउँमा घाम लागेमा मात्र टावर सञ्चालनमा आउने उनले जानकारी दिए ।

‘मछाइनास्थित टावरमा यस क्षेत्रको मुख्य रिपीटरटावर हो । टावर सोलार सिस्टममार्फत चल्दै आएको छ । तर विगत एक सातादेखि घाम लाग्न छाडेपछि सोलारले काम गरेको छैन’, उनले भने । टावर सञ्चालनका लागि स्थलमार्गबाट जेनेरेटर लग्ने प्रयास गरे पनि भेरी नगरपालिकाको पाखेदहमा बाटो भत्किएका कारण समस्या भएको उनको भनाइ छ । भत्किएको सडक मर्मतका लागि सम्बन्धित निकायको ध्यान नजाँदा जाजरकोटलगायत तीन जिल्ला सञ्चारविहीन भएको बताइएको छ ।

घामको विकल्प केही नभएपछि सञ्चार सेवा अवरुद्ध रहेको छ । टेलिफोन लाइन अवरुद्ध भएपछि सरकारी कामकाजसमेत प्रभावित भएको बताइएको छ । इमेल, इन्टरनेट र फोन गर्न पाइएको छैन । जिल्लाको अवस्था के छ भनेर भन्न सकिने अवस्था नरहेको स्थानीयवासी बताउँछन् । अहिलेको समयमा सञ्चार सेवा नै घामको भरमा चलेपछि कसरी कामकाज हुन्छ स्थानीय व्यवसायीको भनाइ छ ।

सडक डिभिजन चौरजहारीको डोजरलाई सडक मर्मत गर्न आग्रह गरे पनि डिभिजन प्रमुख धु्रव झाले त्यहाँको बाटो मर्मत गर्ने काम आफ्नो नभएको बताए । मछाइनास्थित टावरमा विद्युतीकरण नपुग्दा आकाशमा बादल देखिने वित्तिकै सञ्चार सेवामा समस्या हुँदै आएको छ । यसैगरी कुशे गाउँपालिकामा निर्माण भएका टावरहरू सञ्चालनमा आउन नसक्दा त्यहाँका बासिन्दा सञ्चार सेवाबाट वञ्चित हुँदै आएका छन् । करिव ६ महिनादेखि यहाँका बासिन्दा फोन सेवाबाट वञ्चित रहेको गाउँपालिकाका अध्यक्ष हरिचन्द्र बस्नेतले बताए । टावर सञ्चालन नहुँदा यहाँका बासिन्दा अग्लो डाँडामा गएर फोन सम्पर्क गर्न बाध्य भएका छन् ।

प्रतिक्रिया