चितवन । चितवनको भरतपुरस्थित कारागारमा एक जना कैदीमा कोरोना संक्रमण पुष्टि भएपछि उच्च सतर्कता अपनाइएको छ । कारागार कार्यालय पोखराबाट असोज २७ गते यहाँ स्थानान्तरण गरिएका एक जना कैदीमा कोरोना संक्रमण पुष्टि भएको कार्यालयका प्रमुख कमलप्रसाद काफ्लेले जानकारी दिए ।
उनका अनुसार कर्तव्य ज्यान मुद्दामा कैदी जीवन बिताउँदै आएका गोरखा खोप्लाङ्का ७२ वर्षीय पुरुषमा कोरोना संक्रमण पुष्टि भएको हो । कात्तिक १४ गते कोरोना संक्रमण पुष्टि भएपछि उनलाई भरतपुर अस्पतालको आइसोलेसन कक्षमा राखेर उपचार भइरहेको छ ।
प्रमुख काफ्लेले भने, ‘पोखराबाट ल्याउँदा उनको पिसिआर रिर्पोट नेगेटिभ थियो, उपचारका क्रममा क्यान्सर अस्पतालमा कोरोना सङ्क्रमण पुष्टि भएको छ ।’ कैदीमा कोरोना संक्रमण देखिएसँगै कारागारमा उच्च सतर्कता अपनाइएको छ । सामान्य रुघा खोकी आएकालाई छुट्टै क्वारेन्टाइन निर्माण गरी राखिएको छ । अहिले ४६ जना क्वारेन्टाइनमा रहेको उनले जानकारी दिए ।
कारागारमा ७ सय ९५ जना कैदीबन्दी छन् । क्षमताभन्दा बढी कैदीबन्दी भएकाले कोरोना फैलन सक्ने त्रास बढेको उनको भनाइ छ । कोरोना संक्रमणको जोखिम बढेसँगै अस्पतालमा उपचारका लागि पठाइएका कैदीबन्दीलाई समेत क्वारेन्टाइनमा राखेर स्वाब परीक्षण गर्दै आएको उनले जानकारी दिए । कोरोना संक्रमणको जोखिमलाई ध्यानमा राखेर कैदीबन्दीका आफन्तलाई भेटघाट गर्न बन्द गराइएको छ ।
दुई सय ५५ पुरुष र २५ महिला कैदीबन्दी राख्न सक्ने क्षमताका सो कारागारमा अहिले छ सय ३७ पुरुष र ५८ महिला कैदीबन्दी रहेका छन् । उनिहरुसँगै तीन जना आश्रित बालबालिका समेत छन् ।
कोरोनाको जोखिमसँगै अपराधमा कमी
दशैंका वेला हुने आपराधिक घटनामा यो वर्ष कमी आएको छ । कोरोना भाइरस संक्रमणको उच्च जोखिमका कारण बजारमा मानिसको चहलपहल घटेसँगै आपराधिक घटनामा समेत कमी आएको हो । जिल्लामा गत वर्षको दशैंमा विभिन्न अपराधमा ४९ वटा मुद्दा दर्ता भएकोमा यो वर्षको दशैंमा ३९ वटा मुद्दा दर्ता भएको जिल्ला प्रहरी कार्यालयले जनाएको छ ।
कार्यालयका प्रवक्ता प्रहरी नायब उपरीक्षक सूर्यवहादुर थापाका अनुसार गत वर्षको दशैंमा दर्ता भएको विभिन्न मुद्दामा ६१ जना पक्राउ परेका थिए भने यो वर्ष दर्ता भएका मुद्दामा ३३ जना पक्राउ परेका छन् । यही कात्तिक १ गतेदेखि १५ गतेसम्म दशैंको अवधिमा १२ जनाले आत्महत्या गरेका छन् । गत वर्ष दशैंको अवधिमा ९ जनाले आत्महत्या गरेका थिए ।
त्यसैगरी सो अवधिमा चार चोरी, चार जुवातास, एक लागुऔषध, दुई सवारीज्यान, चार सार्वजनिक हितविरुद्धको कसुर, सात फुटकर ज्यान, चार भवितव्य ज्यान र एउटा खोटा चलन (नक्कली मुद्रा) का मुद्दा दर्ता भएको प्रहरी नायब उपरीक्षक थापाले जानकारी दिए ।
उनका अनुसार गत वर्ष सोही अवधिमा सबैभन्दा बढी सवर्जनिक हितविरुद्धको कसुरमा २० वटा मुद्दा दर्ता भएको थियो । त्यसैगरी फुटकर ज्यानमा तीन, सवारी ज्यानमा चार, लागुऔषधमा आठ, जुवामा तीन र कर्तव्य ज्यान, गौवध एबं ज्यान मार्ने उद्योगमा एक–एक वटा मुद्दा दर्ता भएका थिए ।
दशैंको समयमा कोरोना संक्रमण जोखिमका कारण मानिसको चहलपहल कम भएको तथा सुरक्षा व्यवस्था सबल र प्रभावकारी बनाइएका कारण आपराधिक घटनामा कमी आएको उनको भनाइ छ ।
प्रतिक्रिया