दुर्घटनामा दुई जनाको मृत्यु

धादिङ । पृथ्वीराजमार्गअन्तर्गत धादिङको बेनिघाटरोराङ गाउँपालिका–७ चरौँदी कृष्णभिरमा आज तीन वटा सवारी एकापसमा ठोक्किएर भएको दुर्घटनामा दुई जनाको मृत्यु भएको छ ।

मृत्यु हुनेमा धादिङको बेनिघाटरोराङ गाउँपालिका–२ का २७ वर्षीय श्यामकुमार श्रेष्ठ र ठेगाना नखुलेकी एक २० वर्षीया महिला रहेकी छन् । महिलाको घटनास्थलमै मृत्यु भएको हो भने श्रेष्ठको उपचारका क्रममा मृत्यु भएको जिल्ला प्रहरी कार्यालय सूचना अधिकारी प्रहरी नायब उपरीक्षक रुपक खड्काले जानकारी दिए ।

काठमाडौँबाट चितवनतर्फ आउँदै गरेको लु १ ख ९०७९ नंको बस र चितवनबाट काठमाडौँ जाँदै गरेको बा ३ ख १००४ नंको माइक्रो र बा२ख ४५६७ नंको माइक्रो एकापसमा ठक्कर खाँदा भएको दुर्घटनामा ३२ जना घाइते भएका छन् । घाइतेमध्ये १८ जनालाई सामान्य उपचारपछि राजमार्ग सामुदायिक अस्पतालबाट ट्रमा सेन्टरमा पठाइएको छ । गजुरी अस्पतालमा सात र चरौँदी अस्पतालमा दुई जना उपचाररत रहेका छन् । बाँकी यात्रुको उपचारपछि घर पठाइएको छ ।