नेपाल आउँदै आदित्य

काठमाडौं । भारतमा आफ्नो विशिष्ट प्रभाव जमाउन सक्षम गायक आदित्यनारायण झा नेपालमा हुने सांगीतिक प्रस्तुतिका लागि आउने भएका छन् । यही २१ असार अर्थात् जुलाई ६ तारिखमा उनी काठमाडौंको ठमेलमा अवस्थित क्लब फरेनहाइटमा लाइभ प्रस्तुति लागि आउन लागेका हुन् ।

उक्त सांगीतिक प्रस्तुतिमा उनले आफ्ना बलिउडसँगै हिट नेपाली गीतसमेत गाउने आयोजकले जनाएको छ । आदित्यले भिडियो सन्देशमार्फत आफू ६ जुलाईमा नेपाल आउन लागेको जानकारी दिएका छन् । उनले नेपाली दर्शकसँग आफूले समय बिताउँने भन्दै दर्शकलाई निम्तो दिँदै उक्त सन्देशमा भनेका छन्, ‘म आदित्यनारायण भिजिट नेपाल २०२० अन्र्तगत नै नेपाल आउँदैछु ।’

उक्त कार्यक्रममा प्रवेशका लागि दर्शकले एक हजार र १५ सय दरको टिकट काट्नुपर्ने आयोजकले उल्लेख गरेको छ । आदित्यको नेपालमा राम्रो क्रेज देखेर नै सांगीतिक प्रस्तुतिको आयोजना गरेर ल्याउन लागिएको आयोजकले जिकिर गरेको छ ।

पछिल्लो समय नेपाल विदेशी कलाकार तथा गायक–गायिका विभिन्न सांगीतिक प्रस्तुतिका लागि आइरहेका छन् । दर्शकको बाक्लो उपस्थितिका कारण आयोजकले विशेषगरी, बलिउडका चर्चित कलाकार, गायक–गायिकालाई नेपालमा ल्याएर कार्यक्रम गर्न हौसिएका छन् ।