अर्थबजार

प्रमाणपत्र धितो राखेर युवालाई ऋण

रीता लामा २०७६ जेठ १३ गते ८:४३ मा प्रकाशित

घोराही । युवालाई स्वरोजगार बन्नका लागि दाङको एक सहकारी संस्थाले शैक्षिक प्रमाणपत्र धितो राखेर ऋण दिन सुरु गरेको छ । बेरोजगार युवालाई शैक्षिक प्रमाणपत्र धितो राखेर ऋण दिने सरकारी नीति तथा कार्यक्रम अनुरूप घोराहीस्थित सिसा सगुन बचत तथा ऋण सहकारी संस्था लिमिटेडले स्वरोजगार बन्नका लागि युवालाई शैक्षिक प्रमाणपत्र धितो राखेर ऋण दिन सुरु गरेको हो ।

व्यवसाय गर्न चाहने युवाका लागि संस्थाले चार प्रतिशत ब्याजमा कर्जा लगानी सुरु गरेको हो । सहकारी संस्थाका अध्यक्ष बालचन्द्र शर्माले सरकारी कार्यक्रमअनुरूप नै सहकारीले युवाको शैक्षिक प्रमाणपत्र धितो राखेर ऋण दिन थालेको बताए । उनले शैक्षिक प्रमाणपत्र धितो राखेर एसइई पास गरेकालाई ५० हजार, कक्षा १२ उत्तीर्ण गरेकालाई एक लाख ५० हजार, स्नातक उत्तीर्ण गरेकालाई तीन लाख र स्नातकोत्तर उत्तीर्ण गरेकालाई पाँच लाखसम्म ऋण लगानी गर्न सुरु गरेको जानकारी दिए ।

युवा तथा साना व्यवसायी स्वरोजगार कोषको सहयोगमा व्यवसाय गर्न चाहने युवालाई ऋण दिन थालिएको संस्थाका अध्यक्ष शर्माले बताए । उनका अनुसार पहिलो चरणमा संस्थाले विनाधितो प्रतिव्यक्ति दुई लाख रुपैयाँ रकम दिन सुरु गरेको छ । बेरोजगार र देशमै बसेर केही गर्न चाहने युवाका लागि व्यवसायी बनाउन ऋण लगानी सुरु गरेको सहकारी संस्थाका अध्यक्ष शर्माले जानकारी दिए ।

सहकारीले सुरु गरेको युवा ऋण लगानी कार्यक्रमबारे जानकारी दिँदै अध्यक्ष शर्माले स्वरोजगार कोषसँग ५० लाख ऋण सम्झौता भएको र त्यसमध्ये पहिलो चरणमा २५ लाख वितरण गर्न सुरु गरिएको बताए । ‘दुई लाखसम्म लैजाने युवाले केही पनि धितो नराखेर ऋण दिन लागेका छौँ’, उनले भने, ‘यस वर्ष २५ जना युवालाई ऋण दिने तयारी गरेका छौँ, तीमध्ये १३ जनालाई आजबाटै ऋण दिन सुरु गरिनेछ, अरूलाई केही समय पछि दिने हो ।’ दुई लाखले अपुग हुने युवालाई थप रकम आवश्यक परेमा शैक्षिक प्रमाणपत्र धितो राखिने उनले बताए ।

विनाकर्जा युवालाई ऋण दिने कार्यक्रम केही महिना अगाडि नै घोषणा गरिएको थियो । सोही घोषित कार्यक्रमअन्तर्गत ऋण लैजाने युवाको लगत पनि संकलन भइसकेको हँुदा तत्काल कर्जा प्रवाह गरिने उनले बताए । स्वरोजगार कोषको व्यवस्थाअनुसार कोषको रकम कर्जाका रूपमा लैजानेले सुरुमा १० प्रतिशतका दरले नियमित रूपमा मासिक ब्याज बुझाई सबै ऋण चुक्ता गर्नुपर्ने हुन्छ । ब्याजसहितको ऋण चुक्ता भइसकेपछि उनीहरूले तिरेको ब्याजको छ प्रतिशत रकम फिर्ता पाउने व्यवस्था पनि गरिएको छ ।

स्वरोजगार कोषको कर्जा पाउनका लागि १८ देखि ५० वर्षसम्मको नेपाली नागरिक हुनुपर्ने, सहकारी संस्थाको कार्य क्षेत्रभित्र बसोबास गर्ने र व्यवसाय सञ्चालन गर्नुपर्ने संस्थाको नियमअनुसार सदस्यता लिई मासिकरूपमा अनिवार्य बचत गर्नुपर्ने जस्ता नियम लगाइएका छन् ।

यस्तै पुरानो शेयर सदस्यको हकमा निजको नाममा रहेको पुरानो ऋण
चुक्ता गरेको हुनुपर्ने, आफूले गर्न चाहेको व्यवसायको व्यावसायिक परियोजना बनाई पेश गर्नुपर्ने, पारिवारिक सदस्यको सम्पूर्ण विवरण, पारिवारिक व्यवसायको प्रष्ट विवरण पेश गर्नुपर्ने लगायतका व्यवस्था गरिएको छ । ऋण लगिसकेपछि युवाले उक्त रकमबाट व्यवसाय सुरु गर्ने र व्यवसाय गर्न अपुग रकम उनीहरूले शैक्षिक प्रमाणपत्र धितो राखी लैजाने व्यवस्थासमेत गरिएको संस्थाले जनाएको छ ।

प्रतिक्रिया

पछिल्ला अपडेट्स

लोकप्रिय