विदुर । नेपाल कम्युनिष्ट पार्टी (नेकपा)का वरिष्ठ नेता तथा पूर्वप्रधानमन्त्री माधवकुमार नेपालले अहिले सरकारसँग जनताको गुनासा रहे पनि अर्को वर्ष सरकारको प्रशंसाको वर्ष हुने दाबी गरेका छन् ।
प्रेस संगठन नेपाल नुवाकोटले आयोजना गरेको पत्रकार सम्मेलनमा नेता नेपालले सरकारको काँधमा कानुन कार्यान्वयनदेखि धेरै विषयको व्यवस्थापनको जिम्मेवारी एकैपटक आएकाले बाहिरबाट अपेक्षा गरेजस्तो हुन नसके पनि आगामी वर्षदेखि धमाधम देश विकासमा परिणाम देखिने बताए । ‘यो सरकारसँग दुई तिहाइको शक्ति भए तापनि विगतका सरकारभन्दा भिन्न प्रकृतिको हो ।
कर्मचारीको व्यवस्थापन, कानून निर्माण र संविधान कार्यान्वयनको जिम्मेवारी सम्हाल्नुपर्ने अवस्था छ’, नेपालले सबैलाई आशा र धैर्य गर्न अनुरोध गर्दै भने, ‘हामीले लामो राजनीतिक अस्थिरता त झेल्यौँ र कु¥यौँ भने अब छोटो समयपछि नै देश समृद्धिको बाटोमा लम्किनेछ ।’
सरकारविरुद्ध चौतर्फी आलोचना भइरहेकोप्रति लक्ष्य गरी उनले काङ्ग्रेस लगायतका पश्चगामी विरोधी शक्तिको विरोध गरेर मात्रै टिकेको राजनीति अब छिट्टै सकिने दाबी गरे । पश्चिमा शक्तिले पछिल्लो समय नेपालको शान्ति प्रक्रियालाई बिथोल्ने नियतका साथ विज्ञप्ति जारी भएकोप्रति आपत्ति जनाउँदै नेता नेपालले हाम्रो स्वाधीनता र राष्ट्रहितमा काम गरी समस्या हल गर्न आफूहरू आफैँ सक्षम रहेको बताए ।
‘समस्या खडा गर्नेगरी र शान्ति प्रक्रिया बिथोल्ने गरी कहीँकतैबाट काम हुन्छ भने त्यसको फन्दामा हामी पर्नु हुँदैन । छिटोभन्दा छिटो हामीले शान्ति प्रक्रियाका बाँकी कामलाई टुंग्याइदिनुपर्छ,’ उनले भने । सत्यनिरूपणको कामलाई पनि बाँकी राख्न नहुने र बेपत्तासम्बन्धी आयोगलाई पनि लामो समय त्यत्तिकै थन्क्याएर राख्न नहुने उनको धारणा थियो । नेपालको राजनीतिक स्थायित्व र विकास प्रक्रियाविरुद्ध लागिपरेका विदेशी शक्ति र देशभित्रकै केही शक्तिलाई आलोचना हुने आधार र बहाना दिन नहुनेतर्फ जोड दिँदै उनले सबैलाई सचेत हुन आग्रह गरे ।
‘तिनलाई हामीले कुनै बहाना दिन हुँदैन । निहुँ खोज्ने ठाउँ दिनु हुन्न । हामी काम गरौँ, गर्न सक्छौँ’, नेता नेपालले भने । त्यसका लागि पार्टीलाई बलियो बनाउने र नेताहरूबीच समझदारीको वातावरण हुनुपर्नेमा उनले जोड दिए । संसद्बाट केही दिनअघि पारित भएको स्वास्थ्य तथा चिकित्सा शिक्षा विधेयक अनशनरत डा गोविन्द केसीकै मागबमोजिम भएको नेता नेपालको भनाइ थियो । ‘केही छुटेका विषय हुनसक्छन्, त्यसलाई पनि समेट्दै जानेछौँ । विधेयकमा अनाअश्यक कुरा यदि ल्याइएको छ र विदेशीलाई फाइदा पुर्याउने कुरा छन् भने त्यो हामीलाई स्वीकार्य हुन सक्दैन’, उनले भने ।
देशमा भइरहेका हिंसा, बलात्कार तथा अपराधका घटनालाई निरुत्साहित गर्न सरकार प्रतिबद्ध रहेको उनले बताए । सरकारले केन्द्रबाट र विशेषगरी प्रधानमन्त्री कार्यालयले डेक्स नै खडा गरेर देशभरका सुरक्षा अधिकारी, निकाय र प्रशासनिक तहमा सिधै समन्वय गर्ने वातावरण बनाए असुरक्षाको अवस्थामा सुधार हुने उनको भनाइ थियो । वाइड बडीलगायतका भ्रष्टाचारमा गम्भीर र निष्पक्ष ढङ्गले छानबिन गरी दोषीलाई कारवाही गर्न सरकार प्रयत्नशील रहेको उनले बताउए । भ्रष्टाचार गर्न सघाउने र बचाउन खोज्नेलाई पनि खोजीखोजी कानुनी दायरामा ल्याउन सकिएमा मात्रै देशमा सुशासन कायम हुने नेता नेपालको भनाइ छ ।
प्रतिक्रिया