राजविराज, १२ भदौ । सप्तरीका बाढीपीडितलाई विभिन्न संघसंस्थाले राहत वितरण गरेको छ ।
सर्भाइबर्स नेपालले बिपी कोइराला पिस एण्ड डेमोक्रेटिभ सेन्टरको संयोजनमा जिल्लाको सकरपुरा, रम्पुरा मल्हनियाँ, लौनिया र देउरी भरुवाका २२५ जना बाढीपीडित परिवारलाई रु पाँच लाख ५५ हजार बराबरको खाद्यान्न, लत्ताकपडा, बाल्टिन, जग लगायतका राहत सामग्री वितरण गरेको छ ।
नेपाल फर्मास्युटिकल्स प्रालि जीतपुर वीरगन्ज परिवार तथा सोही स्थानका समग्र ट्रेड युनियनले संयुक्तरुपमा छिन्नमस्ता गाउँपालिका– ५ लोखरमका बाढी प्रभावित २०९ परिवारलाई खाद्यान्न, साबुन र औषधि वितरण गरेको छ ।
त्यस्तै नेपाल सरकार, अक्सफाम नेपाल, डिसिए नेपाल र कोशीपीडित समाजले सप्तरीको हनुमाननगर कंकालिनी नगरपालिका वडा नं ११ इनरुवाका १७० परिवारलाई चामल, मुसुरो दाल, चना, सूर्यमुखी तेल, चिनी, नुन लगायतका खानेकुरा वितरण गरेको बताइएको छ ।
यस्तै विभिन्न संघसंस्थाले जिल्लाको देउरी भरुवा, लौनिया, सकरपुरा, रम्पुरा मल्हनियाँ, छिन्नमस्ता र महदेवाका बाढीपीडितलाई राहत वितरण गरेको छ ।
नेपाल परिवार दल केन्द्रीय कार्य समितिले पनि सप्तरीको राजविराज नगरपालिका-१५ स्थित देउरी भरुवा र हनुमाननगर कंकालिनी नगरपालिका वडा नं ८ बेल्हा टोलका बाढीपीडित परिवारलाई राहत वितरण गरेको छ ।
देउरी भरुवाका ९५ परिवार र बेल्टा टोलका ४१ जना बाढीपीडित परिवारलाई राहतस्वरुप चाउचाउ, बिस्कुट, चुरा, नुहाउने साबुन, झुल, तौलिया, लत्ताकपडा लगायतका सामग्री वितरण गरेको परिवार दलले जनाएको छ ।
यस्तै पर्वत सेवा समाज नेपालको सहयोग तथा स्थानीय सेतु सामुदायिक मानवअधिकार मञ्चको संयोजनमा जिल्लाको महदेवा गाउँपालिकाका १०५ परिवारलाई खाद्यान्न र लत्ताकपडा लगायतका राहत सामग्री वितरण गरेको छ ।
यसैगरी सप्तरीको तिलाठी कोइलाडी गाउँपालिका वडा नं १ स्थित बेल्ही टोलका २०० बाढीपीडित परिवारलाई राहत वितरण गरेको छ ।
शेर्पा अस्तुप गुम्बाले सहयोग गर्नुभएको राहतका सामग्री संघीय समाजवादी फोरम नेपालका कार्यकर्ताले बाढीपीडित प्रतिपरिवारलाई २५ किलो चामल वितरण गरेको फोरम नेपालले जनाएको छ ।
यस्तै नेपाल निजामती कर्मचारी संगठन केन्द्रीय कार्यसमितिले सप्तरीको कृष्णाशवरण गाउँपालिकाका १३० परिवारलाई राहतस्वरुव लत्ताकपडा वितरण गरेको छ ।
काठमाडौँको पद्ममकन्या क्याम्पसमा अध्ययनरत विद्यार्थी तथा नेविसंघका विद्यार्थीले सप्तरीको अति विकट मुसहर बस्तीमा पुगेर राहत वितरण गरेको छ ।सप्तरीको खड्ग नगरपालिका–१ सिश्वा बेल्हीमा पुगेर विद्यार्थीले १८ परिवारलाई खाद्यान्न, लत्ताकपडा साथै अन्य उपभोग्य सामग्री वितरण गरेका छन् ।
यसैगरी बाढीबाट प्रभावित जिल्लाको दक्षिणी भेगमा पशु सेवा कार्यालय सप्तरीले आइतबार यहाँ पशु स्वास्थ्य शिविर सञ्चालन गरेको छ ।
पशु सेवा कार्यालयका प्रमुख डा अशोककुमार सिंहका अनुसार जिल्लाको अति प्रभावित हनुमानगर कंकालनी नगरपालिकाको वडा नं १२ डलुवा, वडा नं १४ को रम्पुरा मल्हनिया र तिलाठी कोइलाडी गाउँपालिकाको कोइलाडी हाटियास्थित निमावि स्कुलमा सञ्चालन गरिएको पाँच दिने निःशुल्क शिविरमा ५१३ कृषकका तीन हजार ४५४ पशु चौपायालाई जाँच गरी उपचार गरिएको बताइएको छ ।
साथै रु छ लाख ५० हजार मूल्य बराबरको औषधिसमेत वितरण गरिएको जिल्ला पशु सेवा कार्यालयका प्रमुख डा सिंहले जानकारी दिए ।
प्रतिक्रिया