विद्यालय बनाएर अमेरिकी टोली फर्कियो

कञ्चनपुर, ४ वैशाख । विद्यालय बनाउनका लागि रकमसहित श्रम गर्न कञ्चनपुरको पिलरीफाँटामा आएको अमेरिकाको लिवर्टी हाइस्कुल वासिङ्टनका टोली फर्किएको छ । दुर्गम बस्तीमा विद्यालय भवन बनाउन आएको उक्त अभिभावक र विद्यार्थीको टोलीले नेपाली संस्कृति र सद्भाव बोकेर घर फर्किएको छ ।

नौ विद्यार्थी र छजना अभिभावकसहितको मणिकाधाम पञ्चकोटी बालविद्यालयको भवन निर्माणका लागि वेलडन संस्थाको सहयोगमा विद्यालयमा श्रम गर्न पुगेको टोलीले एक सातासम्मको बसाइँमा नेपाली संस्कृति, पहिरन, परिकार र भाषाबारे बुझने मौका पाएको छ । अमेरिकाबाट श्रम गर्न आएकी कलिनले विपन्न बस्तीका बासिन्दाका लागि विद्यालय भवन निर्माणका लागि श्रम गर्न पाउँदा र शिक्षामा लगानी गर्न पाउँदा निकै खुसी भएको बताएकी छन् ।

उनले जाने बेला भनिन्, ‘यहाँको समुदायसँग बस्न पायौँ यहाँको चालचलन, संस्कृति र रितिरिवाजबारे जानकारी पाउँदा नौलो अनुभूति लिएर फर्कदै छौँ ।’ मिलनसार र मेहनेती समुदायले सिकाएको पाठ आफना लागि नौलो भए पनि यसलाई अपनाउने प्रेरणा मिलेको उनले बताएकी छन् ।

लिवर्टी हाइस्कुलका विद्यार्थी क्विनल्याण्डले यस क्षेत्रको पहाड, हावापानी, जङ्गल हेर्न पाउँदा निकै खुसी लागेको र यहाँ बालबालिकासँग अन्तक्र्रियामा नौला कुरा सिकेको बताए । यहाँ सिकेका कुरा स्वदेशमा फर्केपछि विद्यालयका साथीसँग साटासाट गर्ने उनले बताए । अभिभावक विद्यार्थीका टिम लिडर मार्थाले भने, ‘साँच्चै नेपाल स्वर्ग छ, घुम्नका लागि समय मिलाएर यहाँ आउन बेस छ ।’ आफना साथीलाई नेपालको सौर्दयताबारे जानकारी दिने उनले प्रतिवद्धता व्यक्त गरेका छन् ।

टोलीलाई शुक्रबार यहाँका स्थानीय बासिन्दाले फूलमाला र टिकाटालो गरेर बिदाइ गरेका छन् । एक सातासम्म विद्यालय भवन निर्माणका लागि जग खन्ने, ढुङ्गा, बालुवा बोक्ने, सरिया काटने र बाँध्ने लगायतका कार्य अमेरिकी टोलीले गरेको थियो । वेलडन संस्थाको सहयोगमा पिलरीफाँटामा अमेरिकी विद्यार्थी र अभिभावकको सहयोगमा तीन कोठे विद्यालय भवन निर्माणको कार्य सुरु गरिएको छ । खरको छानो भएको विद्यालयमा पानी पर्नासाथ बिदा दिनुपर्ने बाध्यता थियो स्थानीय लक्ष्मण बुढाले भने, ‘सरकारी पक्षबाट कुनै सहयोग नपाए पनि विदेशी दाताले दिएको रकमले विद्यालय बन्न लागेकोमा खुसी छौँ ।’