आजदेखि एसएलसी

भक्तपुर, १७ चैत । यसवर्षको एसएलसी परीक्षा देशभर बिहीबार बिहान ८ बजेबाट एकैसाथ सुरु भएको छ । परीक्षा नियन्त्रण कार्यालय सानोठिमीका परीक्षा नियन्त्रक कृष्णप्रसाद काप्रीले एसएलसी परीक्षालाई शान्तिपूर्ण र मर्यादित बनाउन विद्यार्थी, अभिभावक, शिक्षक र राजनीतिक दलका प्रतिनिधि एवं सबै सरोकारवालालाई आग्रह गरेका छन् ।

परीक्षामा कुल ६ लाख १५ हजार ५ सय ५३ परीक्षार्थी सहभागी हुने भएका छन् । जसमा नियमिततर्फ ४ लाख ५२ हजार ८ सय ८१ र ‘एक्ज्याम्टेड’तर्फ १ लाख ५९ हजार ४ सय १७ विद्यार्थी सहभागी हुने परीक्षा नियन्त्रक काप्रीले जानकारी दिए ।

यसैगरी प्राविधिकतर्फ ३ हजार २ सय ५५ जना परीक्षार्थी सहभागी हुनेछन् । सबैभन्दा बढी काठमाडौंमा ३५ हजार र सबैभन्दा कम मनाङमा ६९ जनाले परीक्षा दिनेछन् । परीक्षाका लागि देशभर १ हजार ४ सय ४३ परीक्षा केन्द्र निर्धारण गरिएकोे छ ।

एसएलसी परीक्षा बिहीबार १८ चैतदेखि २९ गतेसम्म सञ्चालन हुनेछ । जसअनसार १८ चैतमा अंग्रेजी, १९ मा नेपाली, २१ गते गणित, २२ गते विज्ञान, २३ गते सामाजिक, २४ गते स्वास्थ्य तथा जनसंख्या, २५ गते ऐच्छिक प्रथम, २६ गते ऐच्छिक द्वितीय, २७, २८ र २९ गतेसम्म भने प्राविधिक विषयको बाँकी विषयको परीक्षा सञ्चालन हुने परीक्षा नियन्त्रक काप्रीले बताए ।

कार्यालयले यस वर्षदेखि एसएलसी परीक्षा दिने परीक्षार्थीलाई परीक्षा सकिएकै दिन उनीहरूको परिचयपत्र वितरण गर्ने भएको छ । एसएलसी परीक्षाको नतिजा सार्वजनिक गर्दा विद्यार्थीको नामथर, जन्ममिति, ठेगाना, अंग्रेजी हिज्जे र परीक्षा दिएको विषय गल्ती कम गर्न परीक्षार्थीलाई परीक्षा सकिएको दिन परिचयपत्र वितरण गर्ने भएको हो ।

यसरी परिचयपत्र वितरण गर्दा त्यसमा भएको विवरण र प्रवेश पत्रमा भएको विवरण फरक परेमा विद्यार्थीले गल्ती भएको विवरण सच्याउन १५ दिनभित्र सम्बन्धित जिल्ला शिक्षा कार्यालयमा निवेदन दिनसक्ने काप्रीको भनाइ थियो ।

गतवर्ष ५ चैतदेखि १६ गतेसम्म सञ्चालन भएको परीक्षा यसवर्ष भने तराई आन्दोलनका कारण १३ दिन ढिलो सुरु हुने भएको हो । यसवर्षको एसएलसी परीक्षाको नतिजा ‘लेटर ग्रेडिङ’मा सार्वजनिक गरिने भए पनि परीक्षा सञ्चालनको विधि भने विगतका वर्षमा जस्तै हुने परीक्षा नियन्त्रक काप्रीले जानकारी दिए ।

परीक्षामा अमर्यादित कार्य गर्ने व्यक्ति र नक्कली परीक्षार्थीलाई १ लाख जरिवाना वा ६ महिना कैद वा दुवै सजाय गर्ने व्यवस्था गरेको छ । ‘होमसेन्टर’ भएका विद्यालयमा सोही विद्यालयमा कार्यरत व्यक्तिलाई परीक्षामा खटाउन नपाइने र परीक्षार्थीले कुनै पनि किसिमको अनियमितता एवं अनुशासनहिन काम गरेमा, अर्को व्यक्तिलाई परीक्षा दिन लगाएको पाइएमा परीक्षा रद्द गरी अर्को १ वर्षसम्म परीक्षा दिन नपाउने गरी कारबाही गर्ने भएको छ ।