अर्थबजार

भारतबाट थप १७ मेगावाट विद्युत् आयात

सौर्य अनलाइन २०७० वैशाख १३ गते ३:४२ मा प्रकाशित

काठमाडौं, १३ वैशाख । नेपाल विद्युत् प्राधिकरणलाई भारतले थप १७ मेगावाट विद्युत् दिएको छ ।

भारतको रक्सौलबाट १० मेगावाट र जयनगरबाट ७ मेगावाट विद्युत् थपी विद्युत् दिएको प्राधिकरण भार प्रेषण केन्द्रका प्रमुख भुवन क्षत्रीले जानकारी दिए । उनका अनुसार, ७ वर्षपछि भारतले जयनगर–सिरहा हुँदै बिहीबारबाटै प्राधिकरणलाई विद्युत् दिएको हो ।

गत मंसिर अन्तिम साता प्राधिकरणबाट गएको टोलीले जयनगर–सिरहाबाट १० मेगावाट र रक्सौल–वीरगन्जबाट १० मेगावाट विद्युत् आयात गर्ने सहमति गरेको थियो । सहमति गरेको झन्डै ५ महिनापछि थप विद्युत् भारतले नेपाललाई दिएको हो । प्राधिकरणका अनुसार, हाल बाल्मीकिनगर–गण्डक, दुहबी–कटैया, कटैया–राजविराज, सीतामडी–जलेश्वर लगायतका क्षेत्रबाट गरी १ सय ५० मेगावाट विद्युत् आयात हुँदै आएको छ ।
प्राधिकरणका अनुसार, अहिले विद्युत्को माग ९ सय ८५ मेगावाट रहेकोमा ४ सय ७५ मेगावाट विद्युत्को अभाव छ । निजी क्षेत्रबाट ९८ मेगावाट र प्राधिकरणमार्फत २ सय ६३ मेगावाट विद्युत् उत्पादन हुँदै आएको छ । कुलेखानी दोस्रो जलाशययुक्त आयोजनाको ट्रान्सफर्मरमा आगलागी भएपछि प्राधिकरणले कुलेखानी पहिलो आयोजनाबाट कम विद्युत् मात्र उत्पादन गरिरहेको छ । दैनिक ६ लाख ५० हजार युनिट मात्र उत्पादन गर्ने गरेको र बन्द दोस्रो आयोजनाको खेर जाने विद्युत् कम गराउने प्रयास गरिएको प्रमुख क्षत्रीले जानकारी दिए । १० दिनभित्र दोस्रोको एक युनिट गण्डकबाट ट्रान्सफर्मर ल्याएर प्रतिस्थापन गरिने तथा एक महिनाभित्र बाँकी बिग्रिएका ट्रान्सफर्महरू जडान गरिसक्ने लक्ष्य प्राधिकरणको छ ।

प्रतिक्रिया

पछिल्ला अपडेट्स

लोकप्रिय