काठमाडौं, २१ चैत । भारतले नेपाललाई उपलब्ध गराउँदै आएको विद्युत्म ध्ये ६० मेगावाट कटौती गरेको छ । भारतले पुन: विद्युत् नदिए दैनिक ४ घन्टा लोडसेडिङ बढ्ने सम्भावना छ ।
विद्युत् प्राधिकरणका अनुसार भारतले नेपाललाई दिँदै आएको १ सय ४५ मेगावाट विद्युत्मध्ये रामनगर र दुहबी हुँदै आउने विद्युत्मा ६० मेगावाट कटौती गरेको हो । रामनगर गण्डकबाट आयात हुँदै आएको २५ मेगावाट र दुहबी कटैयाबाट
आएको ७५ मेगावाटमध्ये ३५ मेगावाट विद्युत् बुधबार दिउँसोबाट कटौती गरेको हो ।
भारतले विद्युत् कटौती गरेसँगै पूर्वाञ्चलक्षेत्रमा बुधबार दिउँसोदेखि चार घन्टा अघोषित रूपमा लोडसेडिङ बढाइएको छ । भारतले ३/४ दिनदेखि दुहबी कटैयाक्षेत्रबाट आएको विद्युत्लाई ४० मेगावाटमा सीमित राख्न प्राधिकरणलाई भन्दै आएको थियो ।
प्राधिकरणले अहिले लोडसेडिङ नबढाए पनि कटौती गरिएको विद्युत् पुन: आपूर्ति नभए दैनिक ४ घन्टासम्म लोडसेडिङ बढ्न सक्ने प्राधिकरण स्रोतले जनाएको छ । यसअघि गत माघमा भारतले ३० मेगावाट विद्युत् कटौती गरेपछि दैनिक १२ घन्टाको लोडसेडिङ १४ घन्टा पुर्याइएको थियो । त्यतिबेला ८४ घन्टाको लोडसेडिङ हप्ताको ९७ घन्टा पुगेको थियो ।
यस वर्षको हिउँदमा १२ घन्टाभन्दा बढी लोडसेडिङ नबढाउने तत्कालीन प्रधानमन्त्री डा. बाबुराम भट्टराईको निर्देशनविपरीत १४ घन्टा लोडसेडिङ पुगेपछि भट्टराईकै पहलमा भारतबाट कटौती विद्युत् पुन: आयात गरेर १२ घन्टामा झारिएको थियो । अहिले दैनिक १० घन्टा लोडसेडिङ छ । गत भदौमा भारतले दुहबी हुँदै आएको करिब ३० मेगावाट विद्युत् कटौती गरेपछि हप्ताको ३५ घन्टाबाट बढेर लोडसेडिङ ४८ घन्टा पुगेको थियो ।
‘सकेसम्म लोडसेडिङ नबढाउने पक्षमा छौ, सम्भव नभए बढाउनुको विकल्प पनि छैन’, महाप्रबन्धक राजेश्वरमान सुल्पियाले भने ।
प्रतिक्रिया