१३ औं तिथिमा गोली चल्दा तनाव

मोरङ, ३ मंसिर । मोरङ जिल्लाको दरैया बस्तीमा १३ औं दिनको पुण्यतिथिका अवसरमा आयोजित भोजमा गोली चल्दा तनाव भएको छ । गोली चलाउने युवकलाई प्रहरीले स्थानीयको सहयोगमा पक्राउ गरेको छ ।
शनिबार राति स्थानीय २९ बर्षीय धर्मेन्द वञ्जरालाई अटोमेटीक पेस्तोलसहित पक्राउ गरेको प्रहरीले जनाएको छ । वञ्जाराको साथमा रहेको गोली ४ राउण्ड, म्याग्जीन ३ थान, गोलीको खोका १ थान र को. १२ प ५७५९ नम्वरको मोटरसाइकल पनि प्रहरीले नियन्त्रणमा लिएको छ ।
स्थानीय श्याम राजवंशीका बुबाको १३ औं तिथिको भोजमा सम्पतलाल राजवंशी, भगवान राजवंशी, आंशु महतो र वन्जरासँगै बसेर भोज खाईरहेका बेला वञ्जाराले एक राउण्ड हवाई फायर गरेका थिए ।
हवाई फायरको खबर पाउना साथ खट्टिएको प्रहरी टोलीले स्थानीयको सहयोगमा वञ्जारालाई हतियार र गोली सहित पक्राउ गरेको हो ।