चोरीका सवारीसाधन बरामद

वीरगन्ज : सशस्त्र प्रहरीले भारतबाट चोरी गरेर नेपाल भित्र्याइएका दुई भारतीय सवारीसाधन बरामद गरेको छ । सशस्त्र प्रहरीले कार र मोटरसाइकल बरामद गरेको हो । पर्साको सुर्जाहा–७ बाट बुधबार सशस्त्र प्रहरीले एच आर ६१–६७९८ नम्बरको टाटा भिक्टा मोडलको कार बरामद गरेको हो । कार चोरीको रहेकाले बरामद गरिएको डिएसपी रुम कार्कीले बताए ।
पकाहा मैनपुरमा रहेको सशस्त्र प्रहरीको बेसबाट खटिएको टोलीले ग्रामीण सडकमा सवारीसाधन जाँच गर्ने क्रममा चोरीको भारतीय कार बरामद गरेको हो । चालकले नेपाल प्रवेशको इजाजतका साथै गाडीको स्वामित्वसम्बन्धी कुनै कागजात र प्रमाण पेस गर्न नसकेपछि कार नियन्त्रणमा लिइएको डिएसपी कार्कीले बताए । बरामद कार आवश्यक कारबाहीका लागि वीरगन्ज भन्सार कार्यालयमा बुझाइएको कार्कीले जानकारी दिए ।
यसैगरी, सशस्त्र प्रहरीले पर्साको घोडदौड पिप्राबाट बिहीबार चोरीको भारतीय मोटरसाइकल बरामद गरेको छ । बि आर २२ ए ९८८५ नम्बरको यामाहा ब्रान्डको मोटरसाइकल बरामद गरिएको हो । मोटरसाइकल चालक फरार भएको सशस्त्र प्रहरीको दाबी छ । (सौस)