इरानले भन्यो– इजरायलले आक्रमण बन्द गर्यो भने हामीले बदला लिँदैनौँ

ट्रम्पकाे इजरायल र इरानबीच युद्धविराम घोषणा

एजेन्सी । अमेरिकी राष्ट्रपति डोनाल्ड ट्रम्पले सामाजिक सञ्जालमा इजरायल र इरानबीच पूर्ण युद्धविरामको घोषणा गरेका छन् । हाल यस घोषणामा इजरायलबाट कुनै आधिकारिक प्रतिक्रिया आएको छैन ।

तर इरानी विदेशमन्त्रीले यसको जवाफ दिएका छन् । इरानी विदेशमन्त्री सईद अब्बास अराघचीले भनेका छन्, ‘यदि इजरायलले आक्रमणहरू रोक्यो भने हामीले पनि बदला लिन बन्द गर्नेछौँ ।’

आफ्नो घोषणामा ट्रम्पले भनेका छन्, ‘युद्ध आधिकारिक रूपमा अर्को २४ घण्टामा समाप्त हुनेछ ।’ ट्रम्पले पोस्टमा भने, ‘यो एक युद्ध हो जुन वर्षौँसम्म चल्न सक्थ्यो र सम्पूर्ण मध्य पूर्वलाई ध्वस्त पार्न सक्थ्यो, तर यो भएन र कहिल्यै हुने छैन ।’ अमेरिकी राष्ट्रपति ट्रम्पले यो इजरायल र इरान युद्धलाई १२ दिने युद्ध भनेका छन् ।

यस्तो छ इरानको जवाफ

इरानका विदेशमन्त्री सईद अब्बास अराघचीले भनेका छन्, यदि इजरायलले सैन्य कारबाही बन्द गर्छ भने हामीसँग कुनै पनि प्रकारको बदला लिने कुनै लक्ष्य छैन ।’

सईद अब्बास अराघचीले सामाजिक सञ्जाल एक्समा पोस्ट गरेका छन्, ‘यदि इजरायलले अब आफ्नो अवैध आक्रामकता बन्द गर्छ भने, इरानको पनि प्रतिक्रिया जारी राख्ने कुनै लक्ष्य छैन ।’

उनले भने, ‘युद्धविराम वा सैन्य कारबाहीको अन्त्यको बारेमा अहिलेसम्म कुनै सम्झौता भएको छैन, यद्यपि इजरायली शासनले इरान समय अनुसार बिहान ४ बजेसम्म आक्रमण रोक्छ भने हाम्रो तर्फबाट पनि कुनै बदला लिइने छैन ।’

अराघचीले भने, ‘हाम्रो सैन्य कारबाही अन्त्य गर्ने अन्तिम निर्णय पछि लिइनेछ ।’ अमेरिकी प्रशासनका एक वरिष्ठ अधिकारीले बीबीसीको अमेरिकी समाचार साझेदार सीबीएसलाई बताए अनुसार इजरायल र इरान दुवै युद्धविराममा सहमत भएका छन् ।

सीबीएसको रिपोर्ट अनुसार ट्रम्पले प्रधानमन्त्री बेन्जामिन नेतान्याहूसँग प्रत्यक्ष वार्ता गरेका छन् र इजरायलले इरानले आक्रमण नगरेसम्म उनीहरूले युद्धविराम कायम राख्ने कुरामा सहमति जनाएका छन् ।

वरिष्ठ इरानी अधिकारीहरूले पनि इरान युद्धविराममा सहमत भएको पुष्टि गरेका छन् । प्रशासनका एक वरिष्ठ अधिकारीले भने कि अमेरिकी उपराष्ट्रपति जेडी भान्स, विदेश सचिव मार्को रुबियो र विशेष दूत स्टीव विटकफले प्रत्यक्ष र अप्रत्यक्ष दुवै माध्यमबाट इरानी अधिकारीहरूसँग वार्ता गरेका छन् ।

त्यसपछि युद्धविराम सम्भव भएको छ । प्रतिनिधिसभाका रिपब्लिकन सभामुख माइक जोनसनले ट्रम्पको युद्धविराम घोषणामा प्रतिक्रिया दिएका छन् । जोनसनले एक्स मा लेखेका छन्, ‘शक्ति मार्फत शान्ति ।’